Rama mbledh ministrat dhe drejtuesit politikë te “Vila e Kuqe”

Kryeministri Edi Rama ka mbledhur këtë të premte, 18 shtator, ministrat e kabinetit qeveritar dhe drejtuesit politikë të qarqeve në ambientet e “Vilës së Kuqe” në Tiranë. Takimi ka nisur në orën 09:00 dhe zhvillohet në kuadër të koordinimit të punës së strukturave qeverisëse dhe ndjekjes së objektivave të përcaktuara.

Në fokus të mbledhjes janë edhe dy prej nismave të prezantuara nga mazhoranca gjatë javëve të fundit, “Prania Besnike” dhe “Pasqyrë Albania”.

“Prania Besnike” lidhet me angazhimin e drejtuesve politikë, ministrave, deputetëve dhe zëvendësministrave në terren, për të evidentuar problematikat e ngritura nga qytetarët dhe për t’i përcjellë ato për zgjidhje në strukturat përkatëse. Në takimet e mëparshme të zhvilluara te “Vila e Kuqe”, drejtuesit politikë kanë raportuar mbi problematikat e mbledhura gjatë takimeve me qytetarët.

Ndërkohë, “Pasqyrë Albania” është prezantuar si një tjetër pjesë e strategjisë së re të qeverisë, me fokus te evidentimi dhe ndjekja e çështjeve në terren. Nisma është diskutuar më herët së bashku me “Besa” dhe “Prania Besnike”.

Rama largohet drejt SHBA-ve

Pas përfundimit të takimit, axhenda e kryeministrit pritet të vijojë jashtë vendit. Rama pritet të udhëtojë të shtunën drejt Shteteve të Bashkuara të Amerikës, ku do të marrë pjesë në punimet e Asamblesë së Përgjithshme të Kombeve të Bashkuara në Nju Jork.

Sipas axhendës së raportuar nga mediat, gjatë qëndrimit në SHBA kryeministri pritet të ketë edhe takime me komunitetin shqiptar atje, ndërsa një prej aktiviteteve të parashikuara është në Nju Jork.

Mbledhja në “Vilën e Kuqe” zhvillohet kështu një ditë përpara nisjes së Ramës për në SHBA dhe vjen pas një serie takimesh të kryeministrit me kabinetin dhe drejtuesit politikë të qarqeve, ku në qendër ka qenë organizimi i punës qeverisëse dhe angazhimi i strukturave në terren.