Radhë kilometrike automjetesh në pikën kufitare të Bllatës

Fluksi i lartë i automjeteve ka sjellë radhë të gjata në pikën kufitare të Bllatës, që lidh Shqipërinë me Maqedoninë e Veriut, këtë të enjte.

Situata është rënduar për shkak të mënyrës së përpunimit të udhëtarëve, pasi kalimi në këtë pikë kufitare po kryhet vetëm në një sportel dhe përmes procedurave manuale. Kjo ka shkaktuar vonesa të konsiderueshme dhe pritje të zgjatura për automjetet që presin të kalojnë kufirin.

Ndërkohë, kontrollet vijojnë normalisht në të dyja anët e kufirit. Udhëtarët duhet t’i nënshtrohen verifikimit të dokumenteve si nga autoritetet shqiptare, ashtu edhe nga ato të Maqedonisë së Veriut.

Pritjet e gjata kanë shkaktuar shqetësim te qytetarët, veçanërisht te ata që kanë mbetur për një kohë të gjatë në radhë. Disa udhëtarë pretendojnë se procedurat në anën maqedonase po zhvillohen me ritëm të ngadaltë, duke ndikuar në shtimin e radhëve dhe kohës së pritjes.

Qytetarët kërkojnë ndërhyrje për përshpejtimin e kontrolleve dhe shtimin e kapaciteteve në pikën kufitare, me qëllim përballimin e fluksit dhe shmangien e pritjeve të gjata.