31-vjeçarja vjedh makinën në parkim, arratisja i zgjat shumë pak

Një makinë e marrë pa lejen e pronarit në Sarandë përfundoi sërish në duart e Policisë brenda një kohe rekord. E dyshuara për vjedhjen, një 31-vjeçare nga qyteti bregdetar, u lokalizua rreth gjysmë ore pas ngjarjes, ndërsa udhëtonte me automjetin drejt zonës së tunelit të Skërficës.

Gjithçka nisi në lagjen nr. 1 të Sarandës, ku një qytetar kishte lënë automjetin në hapësirën e parkimit të një hoteli. Kur konstatoi se makina nuk ndodhej më aty, ai iu drejtua Policisë për të denoncuar rastin.

Pas njoftimit, hetuesit nisën verifikimet për të zbuluar se kush kishte marrë automjetin dhe në ç’drejtim ishte larguar. Gjatë hetimeve u identifikua si e dyshuar shtetasja me inicialet E. S.

Sipas të dhënave të hetimit, 31-vjeçarja kishte ndërmarrë edhe një veprim për ta bërë më të vështirë identifikimin e makinës: kishte çmontuar targat dhe i kishte hedhur në një kazan mbeturinash në dalje të qytetit.

Por ky veprim nuk e ndihmoi të shmangte kontrollet. Gjurmimi i automjetit çoi efektivët deri në afërsi të tunelit të Skërficës, ku e reja u ndalua teksa po udhëtonte me makinën e denoncuar si të vjedhur. Nga momenti i marrjes së automjetit deri në ndërhyrjen e Policisë kishin kaluar vetëm rreth 30 minuta.

Makina dhe targat e gjetura u sekuestruan në cilësinë e provës materiale, ndërsa 31-vjeçarja u arrestua në flagrancë, nën dyshimin për kryerjen e veprës penale të vjedhjes.

Çështja i është kaluar Prokurorisë së Sarandës për vijimin e procedurave ligjore.

Njoftimi i plotë:

Vodhi 1 automjet nga vendparkimi i një hoteli, në lagjen nr. 1., kapet pas 30 minutash, nga shërbimet e Policisë, duke drejtuar automjetin e vjedhur, dhe vihet në pranga 31-vjeçarja.

Sekuestrohen automjeti i vjedhur dhe targat e tij, të cilat 31-vjeçarja i kishte hequr dhe hedhur në kazan mbeturinash.

Menjëherë pas kallëzimit të një shtetasi, për vjedhjen e automjetit të tij, të cilin e kishte parkuar në vendparkimin e një hoteli, në lagjen nr. 1, specialistët për Hetimin e Krimeve të Komisariatit të Policisë Sarandë organizuan punën për zbardhjen e vjedhjes. Si rezultat i veprimeve të shpejta hetimore dhe operacionale, u bë i mundur identifikimi, lokalizimi dhe ndalimi i autores së dyshuar të vjedhjes së automjetit, shtetases E. S..

Kjo shtetase dyshohet se ka vjedhur automjetin në pronësi të shtetasit A. M. dhe i ka hequr targat, të cilat i hedhur në një kazan mbeturinash, në dalje të qytetit.

Ajo është lokalizuar dhe ndaluar nga shërbimet e Policisë, në afërsi të tunelit të Skërficës, duke drejtuar automjetin e vjedhur, rreth 30 minuta pas vjedhjes së tij.

Në përfundim të veprimeve procedurale, shtetasja E. S., 31 vjeçe, banuese në Sarandë, u arrestua në flagrancë për veprën penale “Vjedhja”.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.