“E mbajtën 3 ditë në komisariat”

Një qytetar i pranishëm në protestën e zhvilluar përpara Kryeministrisë ka ngritur akuza për dhunë policore ndaj djalit të tij, student, i cili sipas dëshmisë së tij ka pësuar frakturë në hundë gjatë ndërhyrjes së efektivëve.

Në një prononcim për mediat, protestuesi pretendoi se i biri ishte dhunuar gjatë protestës studentore, ndërsa në momentin e përplasjes po largohej për në shtëpi. Ai tha se i riu nuk kishte kryer asnjë veprim të dhunshëm.

Sipas qytetarit, pas ngjarjes ai e kishte dërguar djalin në Spitalin Ushtarak, ku ekzaminimet mjekësore kishin konstatuar frakturë në hundë. Pavarësisht dëmtimit, pretendon ai, studenti ishte mbajtur për tri ditë në komisariat.

Qytetari tregoi gjithashtu se deputeti i Partisë Mundësia, Erald Kapri, ishte interesuar për gjendjen e të riut dhe kishte kërkuar që atij t’i ofrohej ndihma e nevojshme mjekësore.

“Kam qenë pjesë e protestës çdo ditë. Kam çunin student. Ishte në protestë dhe ia thyen hundën. E çova në Spitalin Ushtarak. I bënë disa vizita dhe rezultoi që kishte thyer hundën nga dhuna policore. Ka frakturë. Ai po ikte në atë moment për në shtëpi, pasi mori pjesë në protestë. Nuk po bënte asnjë gjë, asnjë sjellje të dhunshme. Ishte tre ditë në komisariat, në qeli, i shoqëruar, me hundën e thyer”, deklaroi ai.

Në vijim, qytetari e krahasoi sjelljen e policisë me atë të autoriteteve në Serbi, duke përmendur edhe presidentin Aleksandër Vuçiç.

Dëshmia e tij shton akuzat për trajtimin e protestuesve të ndaluar gjatë tubimeve studentore. Deri në këtë moment, pretendimet e bëra publike nga qytetari kërkojnë verifikim nga institucionet përgjegjëse, ndërsa mbetet e rëndësishme të sqarohet nëse të riut iu garantua ndihma mjekësore gjatë kohës që mbahej në komisariat.