Nga rebelimi te ministria, Erion Braçe drejt “fronit” të Bujqësisë?

Në Partinë Socialiste, duket se edhe zhurma e rebelimit mund të kthehet në muzikë qeveritare, mjafton që në fund të vijë oferta e duhur. Erion Braçe, një prej zërave që kohët e fundit ka artikuluar kritika ndaj drejtimit të PS-së, përflitet si kandidat për të marrë Ministrinë e Bujqësisë në kabinetin e Edi Ramës.

Lajmi, që qarkullon në qarqet pranë kryeministrit, vjen në një moment kur Braçe ka shfaqur publikisht pakënaqësi për mënyrën se si funksionon partia ku bën pjesë. Deputeti socialist ka vënë në diskutim përqendrimin e pushtetit, mungesën e debatit të brendshëm dhe hapësirën gjithnjë e më të kufizuar për zërat që nuk pajtohen me vendimet e lidershipit.

Por, nëse emri i tij përfundon në listën e ministrave të rinj, kritiku i vendosur i mekanizmit partiak do të ketë mundësinë ta shohë atë nga një tjetër pozicion: jo më nga jashtë tryezës së vendimmarrjes, por drejtpërdrejt nga një prej karrigeve të saj.

Kthesa vjen pas një episodi që tregoi kufijtë e përplasjes së Braçes me drejtimin socialist. Gjatë diskutimeve për reformën territoriale, deputeti u përball me paralajmërime për pasoja politike në rast se nuk do të mbështeste qëndrimin e partisë. Në momentin e votimit, ai zgjodhi të votojë pro reformës, pavarësisht kritikave të mëparshme për mënyrën se si merreshin vendimet.

Tashmë, sipas zërave që qarkullojnë, në vend të një përplasjeje të re mund të vijë një ofertë për post ministror. Një zhvillim që, po të materializohet, do t’i jepte një tjetër ngjyrim gjithë retorikës së fundit të Braçes për demokracinë brenda PS-së.

Por lista e lëvizjeve të mundshme nuk mbaron këtu. Një tjetër emër që po përmendet për një ngritje në hierarkinë qeveritare është Ulsi Manja, i cili sipas burimeve mund të marrë detyrën e zëvendëskryeministrit.

Ndërkohë, riformatimi i kabinetit mund të përfshijë edhe ministra të tjerë, në varësi të emrave që do të përzgjidhen për të garuar në zgjedhjet e ardhshme vendore. Kandidimet për drejtimin e bashkive mund të hapin kështu një tjetër cikël lëvizjesh në qeveri.

Asambleja e Partisë Socialiste, që pritet të mblidhet nesër, do të jetë një tjetër moment për të kuptuar drejtimin që do të marrë organizimi politik i shumicës. Megjithatë, deri tani nuk ka një konfirmim zyrtar për emërimet që po përfliten.

Në këtë histori, ironia është se Braçe mund të kalojë nga kritikat ndaj mënyrës së qeverisjes së partisë së tij në administrimin e një ministrie të së njëjtës qeveri. Një ndryshim pozicioni që ngre pikëpyetje për fatin e zërave kundërshtues brenda PS-së dhe për raportin mes bindjeve politike dhe karrierës në pushtet.

Në fund, shprehja e vjetër merr një version të përshtatur për politikën shqiptare: qeni që leh nuk të ha, sidomos kur në vend të zinxhirit i ofrojnë një ministri. Dhe në oborrin e pushtetit, duket se nuk ka rëndësi vetëm kush leh më fort, por edhe kush arrin të ulet në tryezën ku ndahen karriget.