“Skënderbeu” kërkon votim për përjashtimin e “Mamicës” nga PS-ja

Zhvillime të reja janë regjistruar në mbledhjen e Asamblesë Kombëtare të Partisë Socialiste, ku Edi Rama ka kërkuar që çështja e Elisa Spiropalit dhe qëndrimi i saj brenda forcës politike të kalojë në votim.

Kryeministri ka kërkuar votimin për përjashtimin e Spiropalit nga Partia Socialiste, në një mbledhje që po zhvillohet me dyer të mbyllura në Gjirin e Lalzit dhe që po shoqërohet me diskutime për riorganizimin e strukturave dhe zhvillimet e brendshme të partisë.

Në të njëjtën mbledhje është diskutuar edhe situata e Erion Veliajt, i cili ndodhet në një përplasje të hapur politike me kryetarin e PS-së.

Për rastin e kryebashkiakut të Tiranës, Rama mësohet të jetë shprehur: “Për atë jo, sepse i ka duart e lidhura”.

Deklarata vjen në një moment kur Veliaj, përmes një mesazhi të përcjellë nga qelia përpara nisjes së Asamblesë, kishte kërkuar debat të hapur, llogaridhënie dhe aktivizimin e procedurës statutore për mocionin e mosbesimit ndaj kryetarit të Partisë Socialiste.

Ndërkohë, kërkesa për votimin e përjashtimit të Spiropalit shton tensionet në mbledhjen e socialistëve, ku po diskutohen edhe ndryshimet në drejtimin politik të qarqeve dhe riorganizimi i partisë përpara zgjedhjeve vendore të vitit 2027.