E mërkurë, 18 nëntor 2026 DENONCO ANONIM Denonco: +355 69 20 95 843
PUBLIK PUBLIK
IGJEUM ngre alarmin për motin e keq: Rrezik për përmbytje në këto tre qarqe
Lajme

IGJEUM ngre alarmin për motin e keq: Rrezik për përmbytje në këto tre qarqe

Instituti i Gjeoshkencave ka paralajmëruar për përkeqësim të kushteve atmosferike në orët në vijim, me reshje të dendura shiu që pritet të përfshijnë kryesisht veriun e Shqipërisë. Sipas parashikimit, në tre qarqe ekziston rreziku i përmbytjeve të lokalizuara, ndërsa në disa zona malore mund të regjistrohen edhe rrëshqitje dherash.

Shkodra, Kukësi dhe Lezha janë qarqet ku pritet të shfaqen problematikat më të dukshme. Në zonat urbane, gjendja e kanalizimeve mund të favorizojë grumbullimin e ujërave dhe përmbytje të lokalizuara, ndërsa në Shkodër dhe Kukës parashikohet edhe mundësia e vërshimit të lumenjve të vegjël malorë.

Sipas IGJEUM, reshjet nuk do të kufizohen vetëm në veri. Në qarqet Dibër, Lezhë, Durrës, Tiranë dhe Elbasan priten reshje me intensitet mesatar deri lokalisht të lartë, të shoqëruara me shtrëngata.

Në Korçë parashikohen reshje të dobëta deri mesatare, ndërsa në pjesën tjetër të territorit pritet një intensitet më i ulët i reshjeve.

Krahas shiut, një tjetër faktor që mund të ndikojë në kushtet e motit është era, e cila sipas parashikimit do të fryjë me intensitet mesatar deri të fortë, veçanërisht përgjatë vijës bregdetare dhe në zonat malore.

Pezullohen lundrimet për mjetet e vogla në Vlorë dhe Durrës

Përkeqësimi i motit ka sjellë gjithashtu kufizime në aktivitetin detar. Në portet e Vlorës dhe Durrësit është pezulluar lundrimi për mjetet e vogla lundruese dhe ato të peshkimit, për shkak të kushteve të pafavorshme në det.

Kapitaneria e Portit të Vlorës ka ndaluar dhënien e lejeve të nisjes për mjetet e vogla dhe ato të peshkimit që synojnë të dalin në det të hapur, jashtë Gjirit të Vlorës. Kufizimi është në fuqi nga ora 08:00 e datës 18 nëntor deri në orën 06:00 të datës 20 nëntor 2026.

Autoritetet portuale u kanë kërkuar subjekteve detare të marrin masa parandaluese, të sigurojnë mjetet në porte dhe të rrisin gatishmërinë e ekuipazheve për të shmangur incidente të mundshme.

Ndryshe nga mjetet e vogla dhe ato të peshkimit, anijet që kryejnë transport ndërkombëtar detar do të vijojnë aktivitetin normal, sipas destinacioneve të përcaktuara.

Situata atmosferike pritet të kërkojë vëmendje të shtuar, veçanërisht në zonat ku ekziston rreziku i daljes së përrenjve dhe lumenjve nga shtrati, si dhe në akset rrugore të prekura nga reshjet intensive.

Na ndiqni në YouTubeVideo, intervista dhe transmetime nga PUBLIK TV Abonohu

Keni një histori? Denonco anonimisht, identiteti juaj mbrohet.

Denonco
DENONCO

Zëri yt bëhet lajm.

Bëhu pjesë aktive e Publik.al. Raporto çdo padrejtësi, korrupsion apo ngjarje, me foto dhe video. Identiteti yt mbrohet nga redaksia.