Zhdukja dhe vrasja e Eglant Koçit, dëshmitë zbulojnë pistën e kriptomonedhave dhe rolin e “Dhelprës së kuqe”
Zhdukja e Eglant Koçit, 34-vjeçarit që humbi kontaktet me familjen më 4 qershor 2026, u kthye në një hetim për rrëmbim dhe vrasje, ku në qendër të dyshimeve u vendosën transaksionet me kriptomonedha dhe marrëdhëniet e tij me persona të përfshirë në këtë aktivitet.
Sipas dosjes hetimore, i riu ishte parë për herë të fundit në Tiranë, duke lëvizur me motorin e tij tip “Honda”. Një ditë më pas, vëllai i tij, Ledio Koçi, denoncoi zhdukjen në Komisariatin nr. 2, duke shprehur dyshimin se Eglanti mund të ishte rrëmbyer dhe vrarë.
Në dëshminë e tij, familjari tregoi se 34-vjeçari merrej me shkëmbimin e kriptomonedhave. Për këtë arsye, hetuesit verifikuan edhe një pikë këmbimi valutor në zonën e Laprakës, pranë Spitalit të Traumës, ku dyshohej se Eglanti konvertonte asetet dixhitale në para fizike.
Pronari i subjektit, Julian Kërçiku, konfirmoi se e njihte të riun dhe se ai kryente transferta valutore, por mohoi që ambienti i tij të përdorej për këmbimin e kriptomonedhave.
Një tjetër person që doli në skenë gjatë hetimeve ishte Armand Shakaj, i njohur me nofkën “Dhelpra e kuqe”. Ai u përmend fillimisht nga nëna e viktimës si mik dhe komshi i të birit.
Në dëshminë e dhënë para policisë, Shakaj deklaroi se ishte takuar me Eglant Koçin më 3 qershor, një ditë përpara zhdukjes së tij. Sipas versionit të tij, i riu i kishte folur për probleme që lidheshin me call center-at dhe kriptomonedhat.
Ky rrëfim u bë pjesë e verifikimeve të grupit hetimor, ndërsa hetuesit vijuan të analizonin marrëdhëniet mes personave të përfshirë në aktivitetin financiar dhe lëvizjet e tyre në ditët para zhdukjes.
Trupi i Eglant Koçit u gjet më 18 qershor në një humnerë në fshatin Cerrunjë, në kufirin mes Tiranës dhe Elbasanit. Ndërkohë, Armand Shakaj vijon të jetë në kërkim, i dyshuar për rrëmbimin dhe vrasjen e 34-vjeçarit.
Hetimet po përqendrohen në zbardhjen e plotë të motivit financiar dhe dokumentimin e rolit të personave që dyshohet se kanë pasur dijeni ose përfshirje në ngjarje.
Keni një histori? Denonco anonimisht, identiteti juaj mbrohet.
Denonco



