E diel, 22 nëntor 2026 DENONCO ANONIM Denonco: +355 69 20 95 843
PUBLIK PUBLIK
Prokuroria kërkon pushimin e akuzës ndaj ish-deputetit Jurgis Çyrbja
Lajme

Prokuroria kërkon pushimin e akuzës ndaj ish-deputetit Jurgis Çyrbja

Ish-deputeti socialist Jurgis Çyrbja nuk do të përballet me akuzën e shpërdorimit të detyrës për çështjen e dyshimeve mbi falsifikimin e dokumentacionit të pronave. Pas hetimeve të kryera nga Prokuroria e Durrësit, organi i akuzës ka arritur në përfundimin se nuk ka prova që e lidhin ish-funksionarin me falsifikimin e dokumenteve apo me përfitime të paligjshme gjatë procedurave të regjistrimit të tokave.

Dosja fillimisht ishte nën hetimin e SPAK, por më pas, pas shpalljes së moskompetencës nga prokurori Dritan Prençi, çështja iu kalua Prokurorisë së Durrësit për vijimin e veprimeve hetimore.

Nga shqyrtimi i dokumentacionit dhe veprimeve të kryera, hetuesit kanë arritur në përfundimin se nuk provohet që Çyrbja të ketë marrë pjesë në falsifikimin e dokumenteve, të ketë pasur dijeni për paligjshmërinë e tyre apo të jetë bashkëpunuar me persona të tjerë për të përfituar personalisht.

Në dosjen e pushimit, Prokuroria vëren gjithashtu se në disa prej aplikimeve për regjistrimin e pronave, Çyrbja kishte kërkuar plotësimin e dokumentacionit ligjor përpara se procedurat të vijonin. Për këtë arsye, Prokuroria e Durrësit i ka kërkuar gjykatës pushimin e akuzës së shpërdorimit të detyrës ndaj ish-deputetit.

Ndryshe paraqitet situata për dy personat e tjerë të përfshirë në këtë dosje, Hysen Gashi dhe Qamil Lila, të cilët janë dërguar për gjykim.

Dy dosje të ndryshme, dy përfundime të ndryshme

Hetimi për dokumentacionin e pronave ishte një nga çështjet që solli përplasjet e para të Çyrbjes me drejtësinë dhe që, në kulmin e hetimeve, u shoqërua me dorëheqjen e tij nga mandati i deputetit.

Megjithatë, ish-deputeti u përball më pas me një tjetër dosje të SPAK-ut, e cila kishte në qendër komunikimet e dyshuara përmes aplikacionit SkyECC. Në këtë çështje ai u akuzua për korrupsion në zgjedhje dhe nxjerrje të sekreteve policore, të cilat, sipas hetimit, u përcilleshin anëtarëve të grupeve kriminale.

Pavarësisht pretendimeve të mbrojtjes se Çyrbja nuk e kishte përdorur aplikacionin SkyECC, ai u shpall fajtor dhe u dënua me dy vite burgim. Ish-deputeti përfundoi vuajtjen e dënimit dhe doli nga qelia në shkurt të këtij viti.

Ndërkohë, ai i është drejtuar Gjykatës së Lartë për të kundërshtuar edhe këtë vendim, duke pretenduar se disponon një shkresë të Policisë së Shtetit, sipas së cilës, nga 29 dhjetori 2020 deri më 7 mars 2021, nuk kishte pasur plan masash për arrestimin e personave të kërkuar në zonat Manëz-Maminas dhe Sallmone. Sipas pretendimit të tij, në këto kushte nuk mund të kishte pasur njoftime për personat problematikë.

Pra, pushimi i kërkuar nga Prokuroria e Durrësit lidhet vetëm me dosjen e dokumentacionit të pronave dhe nuk ndryshon statusin e çështjes tjetër penale për të cilën Çyrbja është dënuar.

Na ndiqni në YouTubeVideo, intervista dhe transmetime nga PUBLIK TV Abonohu

Keni një histori? Denonco anonimisht, identiteti juaj mbrohet.

Denonco
DENONCO

Zëri yt bëhet lajm.

Bëhu pjesë aktive e Publik.al. Raporto çdo padrejtësi, korrupsion apo ngjarje, me foto dhe video. Identiteti yt mbrohet nga redaksia.