U TRAJTUA SI VDEKJE NATYRALE, POLICIA ZBARDH VRASJEN SHOKUESE TË GRUAS NË FIER, ARRESTOHET I SHOQI, PROCEDOHET MJEKU I URGJENCËS

Ngjarja ka ndodhur në Fier në janar të vitit 2017 ndërsa sot policia ka prangosur Namik Velaj, 75 vjeç, banues në Patos, burri i Verke Velajt. Sakaq, policia bën me dije se ka nisur edhe procedimi penal ndaj mjekut, I.T., të urgjencës së Spitalit Rajonal Fier për veprën penale “Shpërdorim detyre”.

MË SHUMË DETAJE:

Specialistët për Hetimin e Krimeve të Rënda në Drejtorinë Vendore të Policisë Fier, kanë rifilluar hetimet për një ngjarje të ndodhur në Janar të 2017 ku ka humbur jetën shtetasja V.V, vdekja e së cilës është trajtuar si vdekje natyrale.

Pas një pune hetimore disa mujore nga Policia e Fierit në bashkëpunim me Prokurorinë e Krimeve të Rënda Tiranë, është arritur të sigurohen prova dhe të meret masa e ndalimit ndaj autorit të dyshuar të vdekjes së shtetases V.V, bashkëshortit të saj, shtetasit:

-Namik Velaj, 75 vjeç, banues në Patos.

Gjykata e Shkallës së Parë për Krimet e Rënda Tiranë, me vendimin e datës 23.02.2018, ka vendosur masën e sigurisë “Arrest në Burg” për veprën penale “Vrasje për shkak të marrëdhënieve familjare” parashikuar nga Neni 79/c i Kodit Penal.

Gjithashtu është marrë masa e heqjes së të drejtës së ushtrimit të profesionit për mjekun e Urgjencës së Spitalit Rajonal Fier, shtetasin I.T si edhe ka filluar procedimi penal për veprën penale “Shpërdorim i detyrës” dhe është dhënë masa e sigurisë “Detyrim paraqitje” në Policinë Gjyqësore.

Vijojnë hetimet për dokumentimin e plotë të ngjarjes.