‘Standard & Poors’ vlerëson ekonominë: Rritja do jetë 4%

DORINA AZO/ Agjencia Ndërkombëtare “Standard and Poors” vlerësoi pozitivisht ecurinë ekonomike të vendit. Raporti i publikuar dje nga prestigjiozja amerikane, vlerësoi se rritja ekonomike e vendit në 3 vitet e ardhshme do të arrijë 4 për qind, e mbështetur nga rritja e konsumit dhe investimet e huaja.

“Standard and Poors” vlerëson se vazhdimi i konsolidimit fiskal do të ndikojë në uljen e borxhit publik në 62.5 për qind brenda vitit 2022. Për ecurinë e ekonomisë dhe analizës së borxhit, Agjencia Ndërkombëtare konfirmoi dje vlerësimin me notë B+.

Kryeministri Edi Rama u shpreh dje në rrjetet sociale se “Standart and Poors” konfirmoi ecurinë pozitive të ekonomisë dhe vlerëson përpjekjet e qeverisë për të luftuar informalitetin dhe vazhdimin e reformave për marrjen statusit të vendit kandidat në BE.

“S&P njeh përpjekjet e qeverisë për të përmirësuar sundimin e ligjit dhe për të luftuar ekonominë informale, për të arritur statusin e kandidatit formal për pranimin në BE. S&P parashikon që ecuria fiskale e Shqipërisë të mbetet pozitive deri në vitin 2021 dhe më e mirë se vendet me vlerësim të ngjashëm. Kjo si rezultat i pritshmërive pozitive të rritjes ekonomike dhe kontrollit të deficitit buxhetor nga qeveria”, u shpreh Kryeministri Rama.

Edhe ministri i Financave dhe Ekonomisë, Arben Ahmetaj, e ka quajtur pozitiv raportin e “Standard and Poors” për ekonominë shqiptare.

Në një status në rrjetet sociale, Ahmetaj shkruan se raporti vlerëson që performanca fiskale e vendit është rritur ndjeshëm në vitet e fundit.

“Në raportin e publikuar ditën e djeshme, S&P vlerëson se performanca fiskale e vendit është rritur ndjeshëm në vitet e fundit, mbështetur nga rritja e qëndrueshme ekonomike dhe nga një kuadër fiskal i p¸rmir¸suar, i cili tanimë e ka vendosur detyrim në ligj kontrollin rigoroz të deficitit dhe uljen e tij, duke vendosur nën kontroll risqet e lidhura me të. Ecuria e performancës fiskale të Shqipërisë vlerësohet të mbetet pozitive deri në vitin 2021 dhe më e mirë se vendet me renditje të ngjashme, e mbështetur nga pritshmëritë pozitive të rritjes ekonomike dhe kontrollit të financave publike. Në të njëjtën kohë vlerësohet performanca në rritje e të ardhurave buxhetore, mirëadministrimi si rezultat edhe i uljes së informalitetit, kontrolli dhe ulja e shpenzimeve dhe vazhdimi i reformave strukturore nga ana e qeverisë, kryesisht ajo në sistemin e drejtësisë, të cilat pritet të reflektohen në një renditje më të lartë vitin e ardhshëm”, u shpreh ministri Ahmetaj.