Zgjedhjet në PD, ja kush do të mund të votojë për kryetarin e ri

Pas 3 javësh anëtarët e PD-së do të votojnë për të zgjedhur kreun e ri të partisë. Pikërisht lista e anëtareve dhe databaza ka qenë edhe një nga kushtet që kundërshtarët e Lulzim Bashës kishin vendosur që të hynin në garë.

Sot dy nënkryetarët, Edi Paloka dhe Edmond Spaho kanë sqaruar edhe këtë fakt.

Databaza e partisë krijohet dhe administrohet në përputhje me statutin e PDSH. Neni 13/1 përcakton detyrimin e mbajtjes së Regjistrit elektronik dhe pika 2 e këtij neni thotë: “Rregullat e hollësishme për formatin e regjistrit, administrimin, dhe aksesimin e tij përcaktohen me vendim të Kryetarit të Partisë.
Në vendimin e dy nënkryetarëve të partisë për hapjen e garës për Kryetarin e PDSH përcaktohet se në votim do të marrin pjesë vetëm ata të cilët janë anëtare të PDSH-së deri në datën 28 qershor 2017.
Që nga data 28 qershor 2017 në PDSH nuk ka pasur dhe nuk do të ketë anëtarësime të reja deri sa të përfundojë procesi i zgjedhjes së kryetarit të saj.
Listat e anëtarësisë administrohen sipas statutit dhe rregullave të përmendura më sipër. Çdo degë e PDSH-së ku do votohet për Kryetarin e PDSH do marrë në avancë në përputhje me vendimin e Komisionit të Organizimit dhe Kontrollit të Operacioneve Elektorale kopje të listës së anëtarësisë të Degës së saj të cilën ajo e disponon edhe në Degë.
Listat e votimit sipas përcaktimeve në statut do administrohen nga komisioni i votimit i cili kryesohet nga Kryetari ose Sekretari i Degës dhe anëtarë të tjerë që i zgjedh Kryesia e Degës. Çdo kandidat do të ketë vëzhgues në çdo komision votimi.
Çdo Degë e PDSH administron databazën e anëtarësisë së saj. Çdo ndryshim në Databazën në qendër bëhet vetëm me kërkesën zyrtare të Degës shoqëruar me dokumentacionin e plotë të anëtarit që shtohet apo largohet.