A do të hetohen aferat e tenderave të Shëndetësisë për Ogerta Manastirliun?

Ndërsa ish-ministrja e Shëndetësisë, Ogerta Manastirliu, përgatitet të garojë për drejtimin e Bashkisë së Tiranës, rikthimi i saj në politikën lokale risjell në kujtesën publike disa nga episodat më të përfolura gjatë periudhës së saj në krye të Ministrisë së Shëndetësisë. Një ndër më të rëndësishmit lidhet me lidhjen e saj me një emër të njohur në botën e furnizimeve farmaceutike — biznesmenin Sokol Topçiu.

Tenderi 324 milionë lekë që ngriti dyshime për monopol të Shëndetësisë

Në vitin 2022, kompania “Farma Net”, e administruar nga Sokol Topçiu, arriti të përfitonte 324 milionë lekë nga buxheti i shëndetësisë për furnizimin me antihelm kundër pickimeve të gjarprit.
Procedura u zhvillua pa asnjë konkurrent tjetër në garë, duke u shënuar me “Flamur të Kuq” nga sistemi i prokurimeve publike për mungesë të plotë konkurrence.

Ky tender u konsiderua një shembull klasik i monopolizimit të tregut dhe përdorimit të garave të mbyllura për të favorizuar kompani të caktuara, në dëm të transparencës dhe parasë së tatimpaguesve.

Biznesmen i dënuar, por i privilegjuar në tendera

Sipas legjislacionit shqiptar, administratorët e dënuar për vepra penale nuk mund të marrin pjesë në tendera publikë.
Megjithatë, në rastin e “Farma Net”-it, ligji u anashkalua me sukses.

Topçiu ka qenë i hetuar dhe i dënuar më herët për kontrabandë të medikamenteve gjatë pandemisë Covid-19 — një periudhë kur sistemi shëndetësor ishte në prag kolapsi dhe çdokush që përfitonte financiarisht nga kriza konsiderohej grabitqar i shëndetit publik.

Heshtja institucionale – mburoja e abuzimeve

Ndërsa opinioni publik shpërtheu me kritika në atë kohë, institucionet zyrtare u mjaftuan me heshtje dhe mbulimin e gjurmëve, duke lejuar që çështje të tilla të kalojnë pa asnjë përgjegjshmëri penale.

Por dokumentet zyrtare, prokurimet dhe kontratat janë ende aty — dëshmi e qartë e mënyrës si janë shpërdoruar paratë publike në një nga sektorët më jetik të vendit.

SPAK duhet të flasë

Nëse Manastirliu kërkon të bindë qytetarët e Tiranës se meriton të drejtojë kryeqytetin, rastet si ai i Sokol Topçiut duhet të marrin një përgjigje urgjente nga drejtësia.

SPAK nuk mund të qëndrojë më spektator.
Shqiptarët presin që:
• të hetohen përgjegjësit politikë,
• të zbardhen aferat e tenderave të Shëndetësisë,
• të vihet drejtësi për paratë e zhdukura.