Aferat e Ballukut dhe ‘misteri’ i kasafortës së Peleshit

Dokumenti i vetëm që është bërë publik deri tani me firmën e kreut të SPAK, Altin Dumani, dhe që i është përcjellë Kuvendit, lidhet me kërkesën për dhënien e autorizimit për arrestimin e zv.kryeministres Belinda Balluku.

Megjithatë, përtej këtij akti, zbulohet se SPAK i ka dorëzuar Kryesisë së Kuvendit edhe një relacion të detajuar, të shoqëruar me prova konkrete, të depozituara në një USB, të klasifikuara si “sekret hetimor”.

Lidhur me këto materiale, kryetari i Partisë Demokratike, Sali Berisha, deklaroi se anëtarëve të Këshillit për Mandatet dhe Rregulloren, i cili pritet të mblidhet të premten, nuk u janë vënë në dispozicion provat e dorëzuara nga SPAK. Sipas tij, dokumentacioni është bllokuar nga shumica.

“Niko Peleshi i ka futur provat në kasafortë dhe po ua mohon deputetëve të opozitës, anëtarë të komisionit për verifikimin e mandateve”, u shpreh Berisha.

Nga ana tjetër në media raportohet se njërit prej drejtueseve të administratës së Kuvendit, i është dërguar një mesazh, drejtuar të gjithë anëtarëve të Këshillit, ku thuhet: “Të nderuar anëtarë të Këshillit për Rregulloren, Mandatet dhe Imunitetin, ju lutemi të paraqiteni pranë sekretarisë për të tërhequr dokumentet”.

Pavarësisht këtij njoftimi, përfaqësuesit e opozitës këmbëngulin se materialet hetimore nuk u janë vënë realisht në dispozicion. Kreu i grupit parlamentar të PD-së ka sqaruar se deputetëve u është dhënë vetëm kërkesa për autorizimin e arrestimit dhe dy vendime gjyqësore, ndërsa mungon USB-ja me mbishkrimin “verbatim”, ku pretendohet se ndodhen provat e SPAK ndaj Ballukut.

Më tej raportohet se në Kuvend kanë mbërritur tre dokumente zyrtare: shkresa njoftuese e firmosur nga Altin Dumani, urdhri i arrestit i prokurorit Dritan Prençi dhe një akt shoqërues që përcakton procedurën e trajtimit të provave në Këshillin për Mandatet, Rregulloren dhe Imunitetin.

Zbulohet se relacioni dhe provat shoqëruese janë të aksesueshme për anëtarët e Këshillit në çdo moment, me kusht që ata të nënshkruajnë deklaratën e konfidencialitetit për ruajtjen e akteve hetimore të klasifikuara nga Gjykata e Posaçme.

Një tjetër USB me materiale hetimore i është dorëzuar Kuvendit nga SPAK, për të cilën kërkohet njohja nga Këshilli i Mandateve, por pa praninë e zv.kryeministres Belinda Balluku gjatë shqyrtimit.

Në këtë kontekst mbetet për t’u parë qëndrimi i shumicës socialiste përballë kërkesës për arrestimin e numrit dy të qeverisë.

Fillimisht në Këshill pritet të dëgjohen të gjitha palët, përfshirë përfaqësuesit e SPAK dhe vetë zonjën Balluku. Më pas, çështja do të diskutohet brenda strukturave të PS-së, përpara se të merret vendimi përfundimtar, që do t’i paraqitet Kuvendit për votim.