Aksident fatal në aksin Shkodër-Lezhë, një viktimë

Një aksident i rëndë rrugor është regjistruar pasditen e kësaj të mërkure në aksin Shkodër-Lezhë, në zonën e Kryebushatit.

Dy automjete janë përplasur me njëri-tjetrin. Si pasojë e aksidentit ka humbur jetën një 83-vjeçar, Gjon Nikaj, banues në Shkodër.

I moshuari u transportua fillimisht në Spitalin Rajonal të Shkodrës për të marrë ndihmë mjekësore, por nuk ka mundur t’u mbijetojë plagëve të marra nga përplasja.

Në aksident është përfshirë edhe një 67-vjeçar, shtetas francez, me inicialet P. L. Ai është shoqëruar në ambientet e Drejtorisë Vendore të Policisë Shkodër për veprime të mëtejshme.

Grupi hetimor vijon punën për sqarimin e plotë të rrethanave të aksidentit dhe dokumentimin e ngjarjes.

Njoftimi i policisë

“Më datë 30.09.2026, rreth orës 15:30, në aksin rrugor “Shkodër-Lezhë”, në vendin e quajtur Kryebushat, janë përfshirë në një aksident rrugor dy automjete, me drejtues shtetasit P. L., 67 vjeç, shtetas francez, dhe Gj. N., 83 vjeç, banues në Shkodër.

Si pasojë e aksidentit, shtetasi Gj. N., ka humbur jetën në Spitalin Rajonal Shkodër.

Shtetasi P. L. është shoqëruar në ambientet e DVP Shkodër, për veprime të mëtejshme.

Grupi hetimor vijon punën për sqarimin e plotë dhe dokumentimin e rrethanave të aksidentit.”