Akuzat ndaj Drejtorit Vilson Bala për dështim operacional

KORÇË – Detaje të reja dhe akuza të rënda kanë lindur pas ngjarjes tragjike në Lozhan të Maliqit, ku mbeti i vrarë efektivi i policisë Enea Mekolli dhe u plagos kolegu i tij, Edison Adri. Burime nga terreni ngrenë dyshime të forta mbi planifikimin e operacionit nga Drejtoria Vendore e Policisë Korçë, nën drejtimin e Vilson Balës.

Sipas të dhënave, menaxhimi i situatës po përballet me kritika të ashpra për tri arsye kryesore:

 Mosvlerësimi i informacionit: Informacionet operative për lëvizjet e të kërkuarit me rrezikshmëri të lartë, Violand Braçellari, kishin mbërritur një ditë para ngjarjes, periudhë gjatë së cilës ai kishte lëvizur lirshëm në fshat përpara se të strehohej në stan.

 Mungesa e forcave të specializuara: Edhe pse 43-vjeçari Braçellari i kishte shpëtuar katër herë më parë operacioneve të RENEA-s, në këtë ndërhyrje u dërguan vetëm 6 efektivë të forcave “Shqiponja” dhe asnjë pjesëtar i reparteve speciale.

 Mungesa e mjeteve mbrojtëse: Burimet bëjnë me dije se efektivët e forcave “Shqiponja” kanë shkuar në këtë operacion të rrezikshëm pa jelekë antiplumb.

Kjo situatë ka ngritur pikëpyetje të mëdha mbi vlerësimin e riskut dhe planin operacional të ndjekur nga drejtori i ri, Vilson Bala, i cili ka marrë detyrën prej pak muajsh.