Alarm në qeli: Përkeqësohet gjendja e Niko Qarkajt pas arrestimit

Gjendja shëndetësore e Niko Qarkajt, një nga personat e ndaluar gjatë protestës së zhvilluar më 2 korrik në Tiranë, ka ngritur shqetësime serioze gjatë orëve të fundit. Sipas informacioneve të raportuara, ai ka shfaqur probleme shëndetësore që kanë bërë të domosdoshme ndërhyrjen e menjëhershme të shërbimit të urgjencës.

Burime pranë ngjarjes bëjnë me dije se autoambulanca ka mbërritur për t’i dhënë ndihmën e parë Qarkajt, pas përkeqësimit të gjendjes së tij. Situata është konsideruar e ndjeshme, duke marrë parasysh edhe historikun shëndetësor të të ndaluarit.

Mësohet se Niko Qarkaj vuan nga epilepsia, një gjendje që kërkon trajtim dhe kujdes të vazhdueshëm mjekësor. Ndërkohë, më herët avokati i tij, së bashku me aktivistë dhe protestues të tjerë, kanë ngritur akuza publike se ai është dhunuar gjatë momentit të arrestimit si dhe gjatë qëndrimit në ambientet e paraburgimit.

Rasti ka rikthyer në vëmendje debatet mbi trajtimin e protestuesve nga autoritetet dhe respektimin e të drejtave themelore të personave të ndaluar, veçanërisht në rastet kur ata kanë probleme të dokumentuara shëndetësore.