Rritet niveli i lumit Erzen

Prurjet e shtuara të lumit Erzen kanë bërë që ura e Vardardhës të mbulohet pothuajse tërësisht nga uji, duke krijuar një situatë shqetësuese për komunitetin lokal.

Banorët, të cilët kanë dërguar pamjet në redaksi, thonë se prej orësh po ndjekin me ankth çdo ndryshim të nivelit të lumit, pasi prurjet po rriten me ritëm të shpejtë.

Sipas tyre, vërshimi i ujit ka arritur tashmë pikë kritike dhe rrezikon të prekë banesat, stallat dhe tokat bujqësore të zonës, të cilat janë burimi kryesor i të ardhurave për shumë familje.

Banorët apelojnë për ndërhyrje të menjëhershme të autoriteteve, duke theksuar se nëse situata përkeqësohet më tej, mund të shkaktojë dëme të konsiderueshme dhe të vërë në rrezik sigurinë e tyre.