“Nëse ai del kandidat, i jap votën time”

Kryetari i Partisë Agrare Ambientaliste, Agron Duka, ka komentuar publikisht ambicien e deputetit socialist Erion Braçe për të kandiduar në krye të Bashkisë së Tiranës.

Duka u shpreh mjaft pozitiv për figurën e Braçes, duke theksuar se ka një simpati personale për të, edhe për shkak të angazhimit të tij në sektorin e bujqësisë dhe qëndrimeve të përbashkëta në disa çështje.

“Erion Braçe, kam simpati personale, ndoshta se është marrë edhe me bujqësinë dhe kemi pasur mendime të afërta. Është i duhuri për bashkinë e Tiranës,” u shpreh ai.

Sipas Dukës, Braçe spikat për integritetin dhe eksperiencën e tij në politikë, cilësi që sipas tij do të përbënin një vlerë për drejtimin e kryeqytetit.

“Si njeri është i ndershëm, do i bënte mirë Tiranës, ka eksperiencë të jashtëzakonshme,” theksoi kreu i PAA.

Megjithatë, ai vuri në dukje se vendimet për kandidaturat nuk varen vetëm nga individët, por nga drejtuesit e partive dhe strategjitë politike.

“Për të vënë kandidaturën, kryetari i partisë sheh problematikat që paraqet një kandidaturë. Votat i ka edhe sigla e partisë,” u shpreh Duka.

Ai shtoi se nuk ka asnjë rezervë ndaj Braçes, duke deklaruar hapur edhe mbështetjen e tij në rast kandidimi.

“Unë e deklaroj, nëse del Braçe i jap votën time, është njeri që ja vlen,” tha Duka.

Duke folur për rolin e Braçes brenda Partia Socialiste e Shqipërisë, Duka vlerësoi kontributin dhe përvojën e tij, madje duke e krahasuar edhe me figura të tjera të rëndësishme politike.

“Ai ka eksperiencë dhe kontribut më shumë se Rama në PS. Ka edhe nuhatje politike,” u shpreh Duka, në një referencë ndaj kryeministrit Edi Rama.

Në fund, ai nuk përjashtoi mundësinë që Braçe të hyjë në garë edhe si kandidat i pavarur, duke shtuar se lëvizjet e tij mund të lidhen me përpjekjet për të konsoliduar mbështetjen brenda socialistëve.