Ami Kozeli me të njëjtin “avaz”, në gjurmët e Gjylit dhe Berberit

Dy procedura me vlerë të konsiderueshme financiare për ndërtimin e segmentit rrugor nga zona e Kombinatit në Tiranë drejt Plepave në Durrës janë vënë nën dyshim për paracaktim të fituesve, duke rikthyer në vëmendje praktikat e mëparshme të Autoritetit Rrugor Shqiptar, ku disa tendera janë hetuar dhe drejtues të lartë kanë përfunduar nën akuzë.

Aktualisht, ARRSH drejtohet nga një ish-zyrtar i lartë i Ministrisë së Infrastrukturës dhe Energjisë, Ami Kozeli, i cili sipas të dhënave dhe informacioneve të mbërritura, po ndjek të njëjtën linjë veprimi si paraardhësit e tij. Dy ish-drejtues të këtij institucioni janë përballur me drejtësinë, njëri me masë sigurie “arrest në burg” dhe tjetri nën hetim dhe gjykim me masë “arrest shtëpie”.

Ndërkohë, ekzistojnë dyshime të forta se vendimmarrjet në këtë institucion nuk janë të pavarura, por ndikohen nga zyrtarë dhe ish-zyrtarë të tjerë, të cilët dyshohet se kanë ngritur një skemë për përfitimin e miliona eurove nga fondet publike. Kjo skemë, sipas burimeve, funksionon duke kanalizuar fondet fillimisht drejt kompanive private dhe më pas në interesa të ngushta personale apo të lidhura me to.

Hetimet e strukturave të posaçme kanë nxjerrë në pah një numër të konsiderueshëm emrash të përfshirë në skema të ngjashme, ndërsa drejtuesi aktual i ARRSH-së rrezikon të përfshihet në një situatë të ngjashme, për shkak të mënyrës së veprimit.

Sipas informacioneve të siguruara dhe dokumenteve përkatëse, rezulton se procedurat për ndërtimin e dy loteve të rrugës Kombinat – Ndroq – Plepa, me një vlerë totale prej 32.4 milionë euro, konsiderohen të paracaktuara. Brenda vetë institucionit dhe në tregun e kompanive të ndërtimit, sipas burimeve, dihen paraprakisht subjektet që pritet të shpallen fituese.

Një element që ngre dyshime është edhe mënyra e ndjekur për shpalljen e procedurave. Ndryshe nga praktikat e mëparshme, ku tenderat hapeshin një nga një, në këtë rast janë hapur njëkohësisht dy procedura përkatëse, për lotin 2 dhe lotin 3 të projektit. Afati për shpalljen e fituesve është caktuar në fillim të muajit gusht 2026.

Kjo datë përkon me periudhën e pushimeve verore, kur aktiviteti institucional dhe vëmendja publike janë më të ulëta. Konkretisht, data 3 gusht është përcaktuar si momenti për hapjen e ofertave, duke ngritur pikëpyetje mbi transparencën dhe qëllimin e kësaj përzgjedhjeje kohore.

Vlera totale e dy procedurave arrin në 27,019,039 euro pa TVSH, ndërsa me përfshirjen e saj shuma shkon në 32,422,846 euro.

Sipas të dhënave, pritet të ketë bashkime operatorësh ekonomikë, përfshirë edhe kompani nga rajoni, çka formalisht krijon idenë e një gare të hapur. Megjithatë, kur fituesit dyshohet se dihen paraprakisht, lindin dyshime serioze për shkelje të ligjit dhe elementë të mundshëm penalë.

Skema e përdorur, sipas burimeve, përfshin futjen në garë të subjekteve të reja në mënyrë formale, të cilat bashkëpunojnë me kompani të njohura, ndërsa rezultati final mbetet i pandryshuar. Këto kompani shpesh konsiderohen si mbulesa ose të lidhura me interesa të caktuara që kanë përfituar vazhdimisht nga fondet publike.

Faksimile: Njoftimi i shpalljes për lotin 2 të rrugës Kombinat – Ndroq – Plepa, me vlerë 12.5 milionë euro

Paralelisht, është hapur edhe procedura për “rikonstruksion i rrugës së vjetër Kombinat – Ndroq – Plepa, Loti 3”, me fond limit prej 1,364,927,749 lekë ose rreth 14.5 milionë euro. Kohëzgjatja e kontratës është 24 muaj dhe afati i fundit për ofertat është po data 03 gusht 2026.

Faksimile: Shpallja e njoftimit për hapjen e tenderit për litin e tretë të ndërtimit të rrugës Kombinat – Ndroq – Plepa

Të dy dokumentet mbajnë firmën e drejtuesit aktual, ndërsa mënyra e përshpejtuar e procedurave dhe përqendrimi i tyre në një datë të vetme shtojnë dyshimet mbi transparencën e procesit.

Brenda institucionit dhe në tregun përkatës flitet se emrat e fituesve janë të njohur paraprakisht, ndërsa mbetet për t’u parë nëse procesi do të konfirmojë këto pritshmëri apo do të ketë zhvillime të papritura.

Ndërkohë, për këto procedura pritet që institucionet ligjzbatuese të kryejnë verifikime të plota, pasi dyshimet për shkelje janë të shumta dhe potencialisht përfshijnë disa vepra penale.

Në fund, mbetet e paqartë nëse drejtuesi aktual do të përballet me të njëjtin fat si paraardhësit e tij, por përmasat financiare të këtyre procedurave dhe mënyra e ndjekur ngrenë pikëpyetje serioze mbi integritetin e procesit.