“Grupet shqiptare operojnë me kartelet në Ekuador”

Gazetari Artan Hoxha ka ndarë detaje të reja lidhur me atë që ai e cilëson si mikrotrafik të kokainës, duke nxjerrë në pah përfshirjen e grupeve shqiptare në rrjetet kriminale në Amerikën Latine.

I ftuar në “Euronews Albania”, Hoxha u ndal te aktiviteti i grupeve ekuadoriane dhe roli i tyre në shpërndarjen e lëndëve narkotike, duke theksuar se në këto struktura janë përfshirë edhe shtetas shqiptarë. Ai përmendi gjithashtu raste konkrete që kanë përfunduar me viktima, si pjesë e përplasjeve mes grupeve kriminale.

Sipas tij, raportet e fundit ndërkombëtare konfirmojnë bashkëpunimin mes karteleve dhe grupeve shqiptare, ndërsa theksoi se hetimet po sjellin prova të reja mbi këtë aktivitet.

Në deklaratën e tij, gazetari u shpreh:

“Grupet ekuadoriane janë më shumë të interesuara për trafikun brenda, ajo që quhet mikrotrafik atje. Sepse Ekuadori, duke mos qenë vend prodhues, është vend tranziti. Nuk prodhon kokainë dhe është i ndërvarur nga kartelet, nga kolumbianët.

Raporti nga Europol konfirmon edhe një herë çfarë kemi thënë në të kaluarën, sot ka prova bindëse që provojnë, po vijnë nga GJKKO-ja. Një rast, ishte direkt e provonte e nisur nga Ergys Dashi është vrarë. Unë kam qenë te lokali ku Ergys Dashi u vra në Guayaquil. Pra, grupet shqiptare atje punojnë ose me njërën kartel, ose me tjetrën. Jo, nuk mund të punosh ashtu sepse ato janë kafshë territori atje dhe kanë territorin e ndarë dhe ti s’mund të punosh dot me të dyja”, tha Hoxha.

Deklaratat e tij hedhin dritë mbi një dimension më pak të njohur të trafikut ndërkombëtar të drogës, ku përfshirja e grupeve shqiptare në Amerikën Latine vazhdon të mbetet një çështje shqetësuese për autoritetet ligjzbatuese.