Astrit Patozi po përgatitet të konkurojë për postin e kryetarit të PD-së

Ish-deputeti demokrat Astrit Patozi po përgatitet të konkurojë në korrik për postin e kryetarit të Partisë Demokratike.
Burime të rezervuara informojnë se Patozi ka diskutuar këtë opsion me disa kolegë të tij duke shpalosur ambicien për të konkuruar përballë Lulzim Bashës për postin e kreut të PD-së, në rast se PD-ja nuk del forcë e parë në zgedhje.
Patozi dhe një grup ish-deputetësh demokratë(Topalli, Bode, Imami, Bregu), realizuan dhe një takim demonstrativ pak orë pasi Lulzim Basha bëri publike listat e kandidatëve për deputet të PD-së.
Zoti Patozi është shfaqur tepër aktiv me prononcime dhe shkrime në media sidomos pas marrëveshjes Rama-Basha për ndryshimet në qeveri.
Në një intervistë të dhënë për Lapsi.al dy ditë më parë, Patozi u shpreh se do të tërhiqte të gjitha kritikat ndaj Bashës nëse ky i fundit do të fitonte zgjedhjet.
Por në rast se Basha nuk do i fitonte, Patozi u shpreh se:
“Është jashtë çdo dyshimi se demokratët kanë vetëm një vendim për të marrë”
Duke lënë të nënkuptuar se ai nuk kishte dilemma për të këmbëngulur në dorëheqjen e parevokueshme të Bashës në rast të mos-fitores në zgjedhje.
Një tjetër detaj interesant në këtë intervistë të zotit Patozi, ishte interpretimi i tij mbi mënyrën si u hartuan listat e kandidatëve për deputetë.
I hartoi Basha pa Berishën? Apo Basha me Berishën?
Zoti Patozi është shprehur se i besonte qëndrimit publik të Berishës ndërsa ky i fundit tha se listat e kandidatëve për deputetë i hartoi tërësisht kryetari Lulzim Basha.
Në qëndrimet e fundit publike, zoti Patozi shfaqet si një ish-deputet i PD-së ‘i zhgënjyer’ nga kryetari Basha por i kujdesshëm (dhe ndonjëherë mirënjohës) me Sali Berishën.
Gjasat janë që ky qëndrim i zotit Patozi të jetë thjeshtë një taktikë e imponuar nga rrethanat, sepse si një mbështetës i dikurshëm i garuesit Sokol Olldashit (për kreun e PD-së), zoti Patozi e di se kur Berisha shfaqet asnjëanës në publik, kjo nuk do të thotë aspak se Berisha nuk e ka të preferuarin e tij.
Berisha ka mbështetur plotësisht Lulzim Bashën në garën për kryetar partie në vitin 2013 dhe nuk duket asnjë e sinjal në horizont për të menduar se Berisha po mbështet dikë tjetër përveç Lulzim Bashës sot.