Ben Blushi hap ekspozitën “Shqiptarë të panjohur” në krah të Edi Ramës në Kryeministri

Albert Mero

Në ambientet e COD-it, në zemër të Kryeministrisë, është çelur ekspozita “Shqiptarë të panjohur” e autorit Ben Blushi, një koleksion prej 42 fotografish që sjell në vëmendje fytyra dhe histori nga Shqipëria e thellë dhe e harruar. Në ceremoninë e hapjes mori pjesë edhe kryeministri Edi Rama, duke i dhënë një profil të veçantë kësaj ekspozite artistike, por edhe simbolike për lidhjet mes artit dhe politikës në Shqipëri.

I ftuar në ekspozitë ishte edhe këshilltari politik në Ambasadën e Francës në Tiranë, Renaud Dorlhiac, njëkohësisht studiues i fotografisë shqiptare.

I impresionuar nga puna e Blushit, Dorlhiac u shpreh se ndonëse autori nuk është një profesionist i fushës, sytë e tij janë ata të një mjeshtri të vërtetë.

“Erdha këtu për një takim, pa njohur asgjë për ekspozitën, por kam zbuluar, për mua, vërtet një fotograf të jashtëzakonshëm. E di që s’është profesionist, por ka një shikim profesionisti. Shumë faleminderit dhe ejani të gjithë për të parë e zbuluar këtë gjë,” tha Dorlhiac.

Përmes një postimi në rrjetet sociale, Ben Blushi ndau disa prej momenteve të hapjes së ekspozitës, ku krahas fotografive, vihej re edhe prania e figurave të larta të shtetit. “SHQIPTARË TË PANJOHUR” – kështu e titullon Blushi ekspozitën që, sipas tij, sjell në vëmendje njerëzit që zakonisht nuk shihen, nuk dëgjohen dhe nuk dokumentohen.

Ekspozita do të qëndrojë e hapur për publikun deri më 30 prill në COD, me orare:

• E hënë – e premte: 09:30 – 20:00
• E shtunë: 09:30 – 12:00

Një ngjarje ku fotografia takon politikën, dhe ku një ish-politikan kthehet në artist për të rrëfyer realitete që shpesh mbeten në hije.