Çahet tubacioni te Unaza e Madhe, përmbytje në banesa dhe biznese

Një incident i papritur është regjistruar në Tiranë, ku një tubacion i ujit të pijshëm është çarë në Rrugën “Vangjel Noti”, në afërsi të Unazës së Madhe, duke shkaktuar përmbytje në disa banesa dhe ambiente biznesi.

Sipas dëshmive të banorëve të zonës, rrjedhja e ujit ka nisur rreth 30 minuta para raportimit, duke krijuar situatë problematike dhe dëme të menjëhershme në pronat përreth. Në vendngjarje kanë mbërritur forcat e policisë, ndërsa deri në ato momente nuk është konstatuar asnjë ndërhyrje nga Ujësjellës Kanalizimet.

Banorët shprehen të indinjuar për mungesën e reagimit të institucioneve përgjegjëse dhe kërkojnë ndërhyrje urgjente për ndalimin e rrjedhjes. Ata gjithashtu hedhin dyshime se çarja e tubacionit mund të jetë pasojë e punimeve të kryera në zonën e Unazës së Madhe, duke vënë në pikëpyetje cilësinë e investimeve infrastrukturore.

Sipas denoncimit të një qytetari, situata është përkeqësuar me shpejtësi, duke përmbytur rrugën dhe duke rrezikuar seriozisht banesat dhe aktivitetet tregtare në zonë. Banorët paralajmërojnë për dëme të mëtejshme nëse nuk ndërhyhet menjëherë për riparimin e tubacionit të dëmtuar.

Autoritetet pritet të reagojnë për të menaxhuar situatën dhe për të përcaktuar shkaqet e incidentit.