Cameron vazhdon vizitën në Kosovë, sot takon presidenten Osmani

Ministri i Punëve të Jashtme i Mbretërisë së Bashkuar, David Cameron po zhvillon një vizitë zyrtare në Kosovë.

Sot Cameron do të zhvillojë fillimisht një takim me ministren e Punëve të Jashtme e Kosovës, Donika Gërvalla-Schwarz.

Pas takimit, Gërvalla dhe Cameron do të mbajnë një konferencë për media.

Më pas ministri britanik i Punëve të Jashtme do të takojë edhe presidenten e vendit, Vjosa Osmani.

Cameron ka arritur mbrëmjen e 3 Janarit në Prishtinë. Ai është pritur në takim nga kryeministri Albin Kurti.

Ky i fundit në një postim në Twitter shkruan se ishte kënaqësi të takojë ministrin e Punëve të Jashtme të Britanisë.

“Kënaqësi të pres ministrin e Jashtëm të Britanisë së Madhe, David Cameron në Prishtinë në udhëtimin e tij të parë ndërkombëtar të këtij viti. Mbretëria e Bashkuar ka qenë një aleat i vendosur dhe besnik i Republikës së Kosovës, që para krijimit të shtetit tonë. Ne jemi mirënjohës për mbështetjen e qëndrueshme dhe marrëdhëniet e shkëlqyera që gëzojmë”, shkruan Kurti.

Cameron ka qenë kryeministër i Mbretërisë së Bashkuar gjatë viteve 2010-2016, ndërsa aktualisht ushtron detyrën e ministrit të Jashtëm.