Dalin rezultatet e para në Kosovë, Kuri nuk e bën dot qeverinë

Rreth 900 mijë qytetarë kanë marrë pjesë sot në zgjedhjet e parakohshme parlamentare në Kosovë, të zhvilluara dhjetë muaj pas procesit të fundit zgjedhor, nga i cili Albin Kurti nuk arriti të sigurojë shumicën e nevojshme për formimin e qeverisë së re.

Në garë morën pjesë 24 subjekte politike me gjithsej 1,180 kandidatë për deputetë. Prej tyre, 8 subjekte politike shqiptare garuan me 624 kandidatë për 100 vendet në Kuvendin e Kosovës, ndërsa partitë e komuniteteve konkurruan për 20 ulëset e garantuara.

Sipas të dhënave paraprake nga Komisioni Qendror i Zgjedhjeve, deri më tani janë numëruar 12.4% e votave. Rezultatet tregojnë se Lëvizja Vetëvendosje kryeson me 46.18% të votave, por ende pa siguruar shumicën prej 61 deputetësh për krijimin e qeverisë.

Në vendin e dytë renditet Partia Demokratike e Kosovës (PDK) me 19.73% të votave, e ndjekur nga Lidhja Demokratike e Kosovës (LDK) me 13.36%.

Aleanca për Ardhmërinë e Kosovës (AAK) pozicionohet e katërta me 7.49% të votave.

Rezultatet përfundimtare pritet të përcaktojnë qartësisht balancat politike dhe mundësitë për formimin e qeverisë së re në Kosovë.