Denoncimi/ Shembet rruga në Kodrën e Gjinve, banorët në ankth

Rruga në Kodrën e Gjinve, që lidh fshatin Luz me fshatin Zall, është shembur, duke shkaktuar panik dhe shqetësim te banorët e zonës për sigurinë e tyre, veçanërisht për fëmijët.

Sipas banorëve, një pjesë e trasesë së rrugës ka pësuar shembje të konsiderueshme, ndërsa familjet që jetojnë pranë saj e kanë thuajse të pamundur lëvizjen, për shkak të rrezikut të vazhdueshëm dhe rrëshqitjes së dherave.

Situata bëhet edhe më problematike pasi shembjet kanë bllokuar qarkullimin e automjeteve, duke izoluar zonën dhe duke vështirësuar lëvizjen e banorëve.

Rastin e ka denoncuar publikisht edhe ish-kandidati për deputet i qarkut Durrës nga radhët e Partisë Demokratike, Aulon Kalaja, i cili ka bërë thirrje për ndërhyrje të menjëhershme nga institucionet përgjegjëse.

Rruga ka nevojë urgjente për ndërhyrje dhe stabilizim të trasesë, për të shmangur rrezikun e aksidenteve dhe për të garantuar sigurinë e banorëve të zonës.