Zbardhen detaje nga konflikti i filmuar në mes të rrugës

Të tjera detaje kanë dalë në dritë lidhur me një përplasje të filmuar në një prej rrugëve të Durrësit, pamjet e së cilës u publikuan në rrjetet sociale nga ish-deputeti Myslim Murrizi.

Në videon e bërë publike shfaqen dy persona të përfshirë në një konflikt, ndërsa njëri prej tyre godet me shuplakë drejtuesin e një motori. Sipas të dhënave të bëra publike në lidhje me rastin, personi që shfaqet duke goditur drejtuesin e motorit është Arjan Xheka.

Xheka është i njohur si pronari i ish-hotelit “Mira Mare” në Durrës, një prej strukturave hoteliere që u shemb pas dëmtimeve të shkaktuara nga tërmeti i 26 nëntorit 2019.

Në lidhje me incidentin, deri tani nuk rezulton të jetë regjistruar një procedim penal. Personi që është goditur në pamjet e publikuara nuk ka bërë kallëzim në polici, duke mos u ndërmarrë për këtë arsye një procedurë penale lidhur me përplasjen.

Ish-deputeti Myslim Murrizi ka deklaruar se personi që shfaqet në video duke drejtuar motorin është Elton Shahini, i cili mban detyrën e shefit të Komisariatit të Policisë Krujë dhe më herët ka drejtuar Komisariatin Nr. 1 në Tiranë.

Në mungesë të një denoncimi nga personi i përfshirë, ngjarja është trajtuar si një konflikt i çastit mes dy personave dhe, sipas të dhënave paraprake, situata është mbyllur mes palëve.

Pamjet e incidentit kanë tërhequr vëmendjen për shkak të përfshirjes së një drejtuesi të strukturave të Policisë dhe publikimit të videos në rrjetet sociale.