Dhunohet gazetari Ervin Dushi në Shkodër

Një incident i rëndë është regjistruar mbrëmjen e djeshme në Shkodër, ku gazetari Ervin Dushi pretendon se është dhunuar nga disa persona pranë një supermarketi në lagjen “Skënderbeg”.

Sipas dëshmisë së tij, autor i sulmit ka qenë shtetasi Prek Gjoni, i njohur si pronari i rrjetit të marketeve “Xhedis”, së bashku me persona të tjerë që e shoqëronin. Dushi lidh ngjarjen me një denoncim të bërë më herët prej tij, në mbështetje të një punonjëseje të këtij biznesi, e cila kishte pasur një konflikt me pronarin.

Pas ngjarjes, gazetari është paraqitur në Policinë e Shkodrës, ku ka bërë kallëzim zyrtar dhe ka deklaruar se do ta ndjekë çështjen përmes rrugëve ligjore dhe institucionale.

Nga ana e saj, policia konfirmon se një shtetas me inicialet E. D., me profesion gazetar, është paraqitur në komisariat duke kallëzuar se rreth orës 20:00 është goditur me grushte nga disa persona, në afërsi të një supermarketi në zonë.

Shërbimet e policisë kanë reaguar menjëherë, duke kryer veprimet e para hetimore dhe duke identifikuar një nga personat e përfshirë, shtetasin me inicialet P. Gj. Ndërkohë, vijon puna për identifikimin dhe shoqërimin e personave të tjerë të dyshuar.

Grupi hetimor, nën drejtimin e Prokurorisë, po vijon punën për zbardhjen e plotë të rrethanave të kësaj ngjarjeje dhe dokumentimin e saj sipas procedurave ligjore.

Shkodër / Informacion paraprak

Në ambientet e Komisariatit të Policisë Shkodër është paraqitur shtetasi E. D., gazetar, i cili ka kallëzuar se rreth orës 20:00 është goditur me grushte nga disa shtetas, në lagjen “Skënderbeg”, përpara supermarketit “Xhedis”.

Menjëherë pas marrjes së njoftimit, shërbimet e Policisë kanë kryer veprimet e para procedurale dhe kanë bërë identifikimin e njërit prej personave, shtetasit P. Gj., ndërsa po punohet për identifikimin e personave të tjerë të përfshirë në këtë konflikt dhe shoqërimin e tyre në Komisariatin e Policisë Shkodër.

Grupi hetimor, nën drejtimin e Prokurorisë, vijon veprimet për sqarimin e plotë të rrethanave të ngjarjes dhe dokumentimin ligjor të saj.