Ditmir Bushati godet Ramën: As brutaliteti policor nuk është zgjidhje

Ish-ministri i Jashtëm, Ditmir Bushati, ka reaguar sërish për situatën e tensionuar në Tiranë, duke dënuar përplasjet gjatë protestës së 24 tetorit dhe duke paralajmëruar se dhuna nuk mund të zgjidhë krizën e krijuar.

Përmes një reagimi në rrjetet sociale, Bushati rendit skenat e regjistruara gjatë protestës, nga përdorimi i gazit lotsjellës dhe shkopinjve të gomës deri te hedhja e molotovëve dhe fishekzjarrëve.

“Gaz lotsjellës, tym, kokteje molotovi, rrahje, alarme, fishekzjarre, shkopinj gome, plumba gome, sprej me piper, përleshje. Skena trazirash nga Tirana ndërsa protestat e studentëve vazhdojnë. As dhuna dhe as brutaliteti policor nuk ofrojnë një zgjidhje për të kapërcyer situatën aktuale të vështirë”, shkruan Bushati.

Reagimi i dytë brenda dy ditësh

Qëndrimi i fundit i ish-ministrit vjen një ditë pas kritikave të tij ndaj situatës politike në Shqipëri. Bushati argumentoi se protestat studentore nuk duhen parë si pengesë për integrimin europian, por në kontekstin e problemeve që kanë nxitur pakënaqësinë qytetare.

Në reagimin e mëparshëm, ai vuri theksin te korrupsioni, përqendrimi i pushtetit, pabarazitë ekonomike dhe dobësitë institucionale, duke i konsideruar këto çështje pjesë të problematikave që qëndrojnë pas revoltës.

Bushati ka kërkuar gjithashtu hetim të pavarur për aktet e dhunës dhe veprimet e forcave të sigurisë, duke nënvizuar rëndësinë e respektimit të shtetit të së drejtës.

Me reagimin e fundit, ish-ministri rikthen në vëmendje mënyrën se si po menaxhohen protestat dhe nevojën që përgjigjja ndaj krizës të mos kufizohet vetëm te ndërhyrjet policore.