Dogana “paralizon” Bankers Peroleum, kompania: Aktiviteti në kolaps!

Bankers Petroleum Albania njofton se aktiviteti prodhues dhe financiar në impiantin e nxjerrjes së naftës në Patos-Marinëz është bllokuar në mënyrë arbitrare dhe në tejkalim të procedurave ligjore, me urdhër të Drejtorit të Përgjithshëm të Doganave. Sipas kompanisë, ky veprim ka çuar operacionet në kolaps të plotë dhe rrezikon mbarëvajtjen e fushës naftëmbajtëse, jetën dhe pronën e banorëve të zonës.

Preteksti i bllokimit është mos-pagesa e pretenduar e akcizës për holluesin e naftës, një produkt për të cilin, sipas legjislacionit shqiptar që prej vitit 2012 dhe Direktivat e Bashkimit Evropian, nuk duhet paguar akcizë, pasi nuk konsumohet në vend dhe nuk përdoret për prodhimin e energjisë ose nxehtësisë. Bllokimi ka ndaluar nxjerrjen e naftës, duke krijuar rrezik të lartë për tubacionet, depozitat dhe puse të ndryshëm, që nëse ftohen mund të bëhen të papërdorshëm.

Institucionet shtetërore përgjegjëse për hidrokarburet, përfshirë Agjencinë Kombëtare të Burimeve Natyrore (AKBN), kanë kërkuar ndërhyrjen e Ministrisë së Financave për të shmangur ndërprerjen e operacioneve. Sipas tyre, procesi i nxjerrjes së naftës duhet të jetë i vazhdueshëm 24/7, pasi nafta bruto e ftohur ngurtësohet dhe nuk mund të rivendoset në përdorim, duke shkaktuar dëme të pakthyeshme në tubacione, depozita dhe puse.

Bankers Petroleum Albania thekson se ky bllokim prek jo vetëm kompaninë dhe operatorët e saj, por edhe rreth 420 punonjës të drejtpërdrejtë, rreth 5.000 punonjës të kompanive nënkontraktore dhe rreth 1.300 punonjës të Albpetrol, si dhe pushtetin vendor, financat e shtetit dhe banorët e zonës. Po ashtu, ekziston rrezik i lartë mjedisor dhe pasigurie për fushën naftëmbajtëse.

Shkaku i bllokimit është taksimi me akcizë i holluesit të naftës, produkt që përdoret për nxjerrjen dhe transportin e naftës bruto drejt rafinerive dhe që nuk konsumohet në vend. Sipas VKM Nr. 726 të vitit 2014, çdo akcizë e paguar për këtë produkt është rikuperueshme 100%, prandaj efekti ekonomik për shtetin dhe kompaninë është zero. Megjithatë, Dogana ka vendosur detyrimin për rreth 3 miliardë lekë dhe një gjobë trefishin e kësaj shume, pa pritur vendimin përfundimtar të gjykatës.

Ky nuk është rasti i parë që Bankers Petroleum përballet me veprime të ngjashme; kompania ka fituar më parë të gjitha proceset gjyqësore të nisura ndaj saj. Megjithatë, bllokimi i aktivitetit pa përfundimin e proceseve gjyqësore ka pasoja të rënda për shtetin, punonjësit dhe komunitetin lokal.

Kompanisë i është aktivizuar gjithashtu klauzola e Forcës Madhore për shkak të veprimeve qeveritare, sipas Marrëveshjes së Hidrokarbureve të vitit 2004. Bankers Petroleum Albania ka depozituar një kallëzim penal pranë SPAK dhe fton të gjitha palët të presin vendimet e gjykatës para se të ndërmarrin veprime që mund të dëmtojnë më tej operacionet dhe fushën naftëmbajtëse.

Njoftimi për Shtyp:

Me urdhër të Drejtorit të Përgjithshëm të Doganave, aktiviteti prodhues dhe financiar i Kompanisë në impiantin e nxjerrjes së naftës në Patos-Marinëz është bllokuar në mënyrë arbitrare dhe në tejkalim të procedurave ligjore, në kundërshtim me:

• Vendimin e Përkohshëm Nr. 3869/2, datë 17.07.2019, ende në fuqi
• Afatin 5-vjeçar të parashkrimit, neni 102 i Ligjit për Akcizat
• Nenit 11 dhe 51 të Ligjit për Akcizat

Dogana ka bllokuar infrastrukturën nxjerrëse të vendburimit të Patos-Marinzës, duke e çuar aktivitetin operativ të Kompanisë në kolaps të plotë. Preteksti i bllokimit është mos-pagesa e pretenduar e akcizës për holluesin e naftës, një produkt për të cilin, në fakt, nuk duhet paguar akcizë, pasi nuk ka konsum në territorin e Republikës së Shqipërisë dhe nuk përdoret për prodhimin e nxehtësisë apo energjisë, sipas kushteve të parashikuara në legjislacionin shqiptar që prej vitit 2012, në përputhje me Direktivat e BE-së.

Ky bllokim ka sjellë ndalimin e operacioneve të nxjerrjes së naftës, duke krijuar rrezik shumë të lartë për mbarëvajtjen e fushës naftëmbajtëse, si dhe duke rrezikuar jetën dhe pronën e banorëve të zonës.

Institucionet teknike shtetërore përgjegjëse për hidrokarburet në Republikën e Shqipërisë (Agjencia Kombëtare e Burimeve Natyrore – AKBN), përmes një letre drejtuar Drejtorisë së Përgjithshme të Doganave dhe Ministrisë së Financave, kanë sqaruar se:

“Procesi i nxjerrjes së naftës në vendburim duhet të zhvillohet me rrjedhje të vazhdueshme dhe të pandërprerë 24/7, pasi në të kundërt, nafta bruto e prodhuar nga ky vendburim, duke qenë shumë viskoze dhe e rëndë, nëse ftohet, ngurtësohet në tubacione dhe depozita, duke u bërë e papërdorshme. Për informacion: nafta bruto lëviz vetëm në gjendje të ngrohtë; nëse ftohet, ngrin dhe nuk lëviz më. Për më tepër, mungesa e kapaciteteve depozituese për një kohë të gjatë do të sjellë domosdoshmërisht ndërprerjen dhe ndaljen e vendburimit, së bashku me të gjitha pasojat e padëshiruara që lidhen me to.”

Nëpërmjet një shkrese zyrtare, AKBN ka kërkuar ndërhyrjen e Ministrisë së Financave për të shmangur bllokimin e operacioneve të Kompanisë.

Ky bllokim i menjëhershëm i operacioneve sjell pasoja të pariparueshme për vazhdimësinë e menaxhimit të fushës naftëmbajtëse, pasi (përveç depozitave dhe tubacioneve) nëse ndalohet prodhimi i puseve të naftës, pjesa më e madhe e tyre nuk mund të rivihen më në punë, duke e dëmtuar në mënyrë të pakthyeshme këtë pasuri të popullit shqiptar. Theksojmë se dëmi ekonomik i shkaktohet shumë më tepër shtetit shqiptar sesa BPAL-së, i cili është vetëm operator i këtij vendburimi dhe jo pronar i tij, ndërkohë që impakti i përgjithshëm është edhe më i madh.

420 punonjësit e BPAL-së dhe rreth 5.000 punonjës të kompanive nënkontraktore, ofruesve të shërbimeve dhe partnerëve të biznesit, përfshirë edhe rreth 1.300 punonjës të kompanisë shtetërore të naftës Albpetrol sh.a. (e cila varet tërësisht nga prodhimi para-ekzistues që i dorëzon BPAL), rrezikojnë të mbeten pa punë. Po ashtu, rreth 12 kilometra tubacione nafte, depozita naftëmbajtëse, mbi 1.000 puse nafte, impiante përpunimi, etj. (investime të BPAL-së që janë në pronësi të shtetit shqiptar), të cilat duhet të mirëmbahen 24 orë në ditë, rrezikojnë të dëmtohen në mënyrë të pakthyeshme.

Këto veprime nuk prekin vetëm BPAL-në, por edhe një zinxhir të gjerë kompanish nënkontraktore që punojnë çdo ditë me BPAL-në dhe rrezikojnë të mbeten pa punë; pushtetin vendor, i cili përfiton taksa nga operacionet e BPAL-së; banorët e zonës naftëmbajtëse të Patos-Marinzës, jetët dhe pronat e të cilëve rrezikohen në rast incidentesh në fushën e naftës, e cila paraqet rrezikshmëri të lartë nëse operacionet bllokohen; financat e shtetit shqiptar; si dhe shumë të tjera. Gjithashtu, ekzistojnë rreziqe të larta mjedisore (HSE), përfshirë dëme dhe humbje në fushën naftëmbajtëse.

Shkaku i bllokimit të veprimtarisë së Kompanisë është taksimi me akcizë i holluesit, një çështje e diskutuar prej vitesh nga shteti shqiptar nëse Kompania duhet apo jo të paguajë akcizë për këtë produkt. Sqarojmë se holluesi është një lëndë e parë që përzihet me naftën e rëndë të Patos-Marinzës për të mundësuar nxjerrjen më të lehtë nga nëntoka dhe transportimin drejt rafinerive. Ky produkt injektohet në puse dhe nxirret i trupëzuar bashkë me naftën bruto nga nëntoka. Nëse kjo naftë do të konsumohej brenda vendit, do të ishte logjike të paguhej akciza për holluesin; por kjo naftë nuk konsumohet në vend, por eksportohet. Ky fakt certifikohet nga certifikime ndërkombëtare për çdo ngarkesë, të monitoruara 24 orë në ditë nga autoritetet shqiptare si Dogana Fier, AKBN, Albpetrol dhe ISHTI.

Për më tepër, Qeveria Shqiptare, me Vendimin e Këshillit të Ministrave (VKM) Nr. 726, datë 12.11.2014 (VKM që miraton marrëveshjen e dytë ndryshuese me BPAL), ka përcaktuar se nëse BPAL paguan akcizë për holluesin, ajo konsiderohet kosto e rikuperueshme në masën 100%. Pra, në të dyja rastet, efekti ekonomik për shtetin shqiptar dhe BPAL-në është zero.

Ndërkohë, Dogana, përveçse e përcakton si detyrim, i ka vendosur BPAL-së, për vlerën e pretenduar të papaguar të akcizës (rreth 3 miliardë lekë), si detyrimin ashtu edhe një gjobë në masën trefish të detyrimit të pretenduar të akcizës.

E gjithë çështja është aktualisht në proces gjyqësor dhe ende nuk ka një vendim të formës së prerë, ndërkohë që organet shtetërore, pa pritur vendimin e gjykatës, po ndërmarrin veprime arbitrare.

Ky nuk është rasti i parë që BPAL përballet me akte të tilla abuzive. Në këto raste, ne kemi fituar çdo proces gjyqësor. Megjithatë, bllokimi i aktivitetit të Kompanisë pa pritur përfundimin e procesit gjyqësor është një akt dashakeq që dëmton më shumë shtetin shqiptar, punonjësit e industrisë, kompanitë nënkontraktore, komunitetin lokal, pushtetin vendor dhe shumë të tjera.

Gjatë gjithë kësaj periudhe kemi qenë në komunikim të vazhdueshëm me autoritetet shtetërore për të arritur një zgjidhje të përshtatshme të kësaj situate, por deri më tani nuk është arritur asnjë rezultat pozitiv.

Nëpërmjet këtij komunikimi me median, u bëjmë thirrje të gjitha institucioneve që ta administrojnë me maturi këtë situatë delikate. Pas 6 vitesh pezullimi të rezultateve të kontrollit, të cilat janë konsideruar të paligjshme nga vetë Administrata Shtetërore, nuk ka arsye për nxitim në ndjekjen e një çështjeje që do të sjellë dëme të pakthyeshme për Kompaninë.

Ky zhvillim ka aktivizuar klauzolën e Forcës Madhore për shkak të “veprimeve qeveritare”, sipas pikës 17.1 të Marrëveshjes së Hidrokarbureve të vitit 2004, të nënshkruar me shtetin shqiptar.

Ju informojmë se kemi depozituar një kallëzim penal pranë SPAK kundër funksionarëve përgjegjës dhe ftojmë të gjitha palët të presin rezultatet e hetimit dhe vendimet e gjykatave përpara se të ndërmarrin veprime arbitrare.

Bankers Petroleum Albania

15 dhjetor 2025