Dorëzohet Vuçiç, njofton zgjedhje të parakohshme në Serbi

Presidenti i Serbisë, Aleksandar Vuçiç, ka deklaruar se do të shpallë zgjedhje të parakohshme parlamentare, si përgjigje ndaj protestave të vazhdueshme kundër qeverisë së tij.

Tensionet nisën në nëntor të vitit 2024, pas rrëzimit tragjik të çatisë së një stacioni hekurudhor në Novi Sad, ku humbën jetën 16 persona. Tragjedia shkaktoi reagime të forta publike dhe protesta të gjera, me akuzat e aktivistëve për korrupsion qeveritar dhe kërkesa për dorëheqjen e Vuçiçit si dhe për mbajtjen e zgjedhjeve të reja.

Nga ana tjetër, presidenti serb dhe mbështetësit e tij e kanë cilësuar lëvizjen si të orkestruar nga faktorë të huaj, duke e përshkruar atë si një “revolucion me ngjyra” të mbështetur nga Perëndimi përmes OJQ-ve. Vuçiç madje ka akuzuar opozitën për bashkëpunim me agjenci të inteligjencës perëndimore, kroate dhe shqiptare, me synimin për ta rrëzuar qeverinë.

Në një deklaratë për mediat të dielën, ai tha se zgjedhjet “do të mbahen përpara përfundimit të mandatit” të parlamentit aktual, i cili skadon në dhjetor 2027. “Institucionet do të veprojnë në përputhje me Kushtetutën dhe ligjet, por zgjedhjet e parakohshme do të zhvillohen përpara afatit ligjor,” u shpreh Vuçiç, duke shtuar se data e saktë do të përcaktohet më vonë.

Në komente të tjera, ai përmendi një “periudhë gjashtëmujore”, që shumë media serbe e interpretuan si sinjal se zgjedhjet mund të mbahen gjatë vitit të ardhshëm.

Deklarata e presidentit erdhi pas disa ditësh protestash të reja në përvjetorin e parë të tragjedisë së Novi Sadit. Në Beograd, përkrahësit dhe kundërshtarët e Partisë Përparimtare Serbe (SNS) u përplasën, pavarësisht ndërhyrjes së policisë. Sipas mediave vendase, janë raportuar hedhje shishesh e fishekzjarrësh dhe dhjetëra persona janë arrestuar.

Nën trysninë e opinionit publik, qeveria kishte bërë më herët disa lëshime ndaj protestuesve, si dorëheqje ministrore dhe publikimin e dokumenteve që lidhen me ngjarjen e Novi Sadit.