Durim Bami transferohet sërish, këtë herë në burgun e Peqinit

Pas kërkesës së tij për t’u larguar nga burgu 313 drejt atij të Fushë-Krujës, për shkak të shqetësimeve për sigurinë personale, Durim Bami është transferuar sërish nga autoritetet penitenciare.

Gjatë ditës së sotme, ai është zhvendosur nga institucioni i vuajtjes së dënimit në Fushë-Krujë drejt burgut të sigurisë së lartë në Peqin.

Zyrtarisht nuk janë bërë publike arsyet e këtij transferimi të ri, por burime pranë sistemit të burgjeve bëjnë me dije se çështjet e sigurisë mbeten faktori kryesor që ka diktuar këtë vendim.

Lëvizja e Bamit vjen në një moment kur në të gjithë sistemin penitenciar po zhvillohen kontrolle të shtuara në qeli, përfshirë edhe institucionet e sigurisë së zakonshme. Këto verifikime janë pjesë e një plani masash të ndërmarrë nga Drejtoria e Përgjithshme e Burgjeve.

Qëllimi i këtyre kontrolleve është goditja e paligjshmërisë brenda burgjeve, duke sekuestruar telefona dhe sende të ndaluara, si dhe duke kufizuar takimet e posaçme të disa të dënuarve, për të cilët dyshohet se kanë zhvilluar kontakte jashtë rregullave me persona që nuk janë familjarë të tyre.