Pikëpyetje rreth një skenari të mirëkalkuluar

Ndërsa Shqipëria zien nga protestat që kanë hyrë në ditën e 67-të dhe presioni për dorëheqjen e kryeministrit sa vjen e rritet, Edi Rama shfaqet në një realitet krejt tjetër: i qetë, në det, larg çdo tensioni politik.

Pamjet e publikuara së fundmi nga Dhërmiu e tregojnë kryeministrin duke lundruar me skaf, në shoqërinë e familjes, i relaksuar dhe i shkëputur totalisht nga situata në vend. Por ajo që po ngre më shumë pikëpyetje nuk është pushimi luksoz, por mënyra se si këto pamje “rastësore” po dalin në publik.

Videoja është realizuar nga shumë pranë, në një zonë ku zakonisht siguria për një figurë të tillë është maksimale. Si është e mundur që dikush të filmojë kaq afër? Dhe mbi të gjitha, si përfundon materiali në rrjet brenda pak orësh?

Menjëherë pas videos, një tjetër foto bëri xhiron e rrjeteve: Rama i shtrirë në shezlong, duke lexuar, në një skenë që më shumë duket e kuruar sesa spontane. Edhe kjo pamje, e kapur nga afër, ka shtuar dyshimet se asgjë nuk është aq e rastësishme sa duket.

Në rrjetet sociale kanë shpërthyer komentet: a kemi të bëjmë me një strategji të pastër komunikimi për të projektuar imazhin e një lideri të paprekur nga kriza? Një përpjekje për të zhvendosur vëmendjen nga protestat tek një narrativë e kontrolluar?

Deri më tani nuk ka asnjë reagim zyrtar, por koha dhe konteksti nuk duken aspak të rastësishme. Në një moment kur protestat po marrin jehonë ndërkombëtare dhe debati politik është në kulm, çdo imazh i tillë peshon më shumë se kurrë.

Rastësi apo skenar? Pyetja mbetet e hapur, por një gjë është e sigurt: videot nga Dhërmiu kanë bërë më shumë zhurmë sesa vetë pushimet.