E rëndë në Durrës, burri godet me thikë bashkëshorten

Një grua ka mbetur e plagosur pas një konflikti me bashkëshortin e saj në zonën e Shkozetit në Durrës.

Ngjarja ka ndodhur pasditen e sotme, ndërsa sipas informacioneve paraprake, gjatë debatit mes çiftit, burri dyshohet se ka përdorur një thikë dhe ka goditur bashkëshorten, duke i shkaktuar plagë në trup.

Pas marrjes së njoftimit, në vendngjarje kanë mbërritur shërbimet e Policisë dhe ambulanca. Gruaja e plagosur është transportuar drejt Spitalit të Durrësit, ku po merr ndihmën e nevojshme mjekësore.

Deri në këto momente nuk ka një informacion zyrtar mbi gjendjen shëndetësore të saj.

Ndërkohë, Policia ka nisur hetimet për të zbardhur rrethanat dhe dinamikën e konfliktit, si dhe për të përcaktuar përgjegjësitë.

Mbetet gjithashtu për t’u konfirmuar nëse bashkëshorti i dyshuar është shoqëruar apo arrestuar nga Policia.