Edhe gjimnazistët e Burrelit në protestë, bojkotojnë mësimin

Protestat e të rinjve kundër qeverisë po vijojnë në disa qytete të Shqipërisë. Pas nxënësve në Lezhë dhe Kamëz, edhe gjimnazistët në Burrel i janë bashkuar reagimit, duke bojkotuar procesin mësimor dhe duke kërkuar largimin e kryeministrit Edi Rama.

Gjatë tubimit, nxënësit kanë brohoritur në kor thirrjen “Rama, jep dorëheqjen!”, duke shprehur pakënaqësinë e tyre ndaj qeverisë.

Mobilizimi i gjimnazistëve vjen në ditën e katërt të protestave të studentëve dhe qytetarëve kundër kryeministrit. Pjesëmarrësit shprehin akuza për korrupsion dhe keqmenaxhim ndaj qeverisë dhe mazhorancës, duke kërkuar përgjegjësi për mënyrën se si drejtohet vendi.

Përfshirja e nxënësve në protesta, në qytete të ndryshme, shënon zgjerimin e lëvizjes përtej kryeqytetit, ndërsa reagimet kundër qeverisë vijojnë të shoqërohen me bojkot të mësimit dhe thirrje për dorëheqjen e Ramës.