Elisa Spiropali jashtë PS-së? Deputetja socialiste zbulon si qëndron e vërteta
Diskutimet për të ardhmen politike të Elisa Spiropalit brenda Partisë Socialiste vijojnë të mbeten pa një përgjigje përfundimtare. Deputetja socialiste Aulona Bylykbashi ka reaguar lidhur me pretendimet për përjashtimin e Spiropalit nga partia, duke deklaruar se deri më tani nuk është marrë një vendim zyrtar.
E pyetur nëse procedura e ndjekur nga strukturat socialiste përbën shkelje të statutit të PS-së, Bylykbashi u shpreh se nuk sheh një shkelje të tillë. Sipas saj, procesi është ende në shqyrtim dhe çdo vendimmarrje duhet të kalojë përmes strukturave që përcaktohen në mënyrë të qartë nga statuti i partisë.
“Jo, nuk mendoj që u shkel statuti. Mendoj që në raport me këtë vendimmarrje, që akoma nuk është vendimmarrje e plotë, sepse çdo vendim ka të përcaktuara strukturat që e marrin atë dhe këtë e përcakton po statuti, është një gjë në proces që po diskutohet në strukturat përkatëse që ky statut përcakton. Kur të ketë një vendimmarrje, do të jetë edhe publike”, deklaroi deputetja në një intervistë për A2.
Bylykbashi u pyet gjithashtu për përmbajtjen e mbledhjes me dyer të mbyllura, ku janë diskutuar zhvillimet e fundit brenda partisë. Ajo zgjodhi të mos japë detaje nga diskutimet e brendshme, duke argumentuar se ato u përkasin anëtarëve të organizatës politike.
“Gjithë janë të njohur me zhvillimet e Asamblesë. Ajo që flitet brenda familjes qëndron brenda familjes dhe është një çështje që u takon anëtarëve të kësaj familjeje, ndërkohë që çdo gjë tjetër besoj se u bë publike për të gjithë”, u shpreh ajo.
Duke folur për mbledhjen e Asamblesë, deputetja socialiste theksoi se një prej objektivave kryesore ishte nisja e përgatitjeve për zgjedhjet vendore të vitit 2027. Sipas saj, takimi shërbeu gjithashtu për të përcaktuar drejtimet politike dhe organizative të PS-së në fazën aktuale të procesit të integrimit europian të Shqipërisë.
“Asambleja ishte një moment për të filluar organizimin për zgjedhjet vendore të vitit 2027. Ishte një moment shprehjeje dhe vendosjeje të piketave se në cilin moment ndodhet Shqipëria në raport me rrugëtimin e saj të integrimit europian”, deklaroi Bylykbashi.
Pavarësisht diskutimeve që kanë shoqëruar emrin e Elisa Spiropalit, deklaratat e deputetes socialiste lënë të kuptohet se çështja nuk ka marrë ende një zgjidhje përfundimtare. Një vendim zyrtar për këtë çështje, sipas Bylykbashit, do të bëhet publik vetëm pasi të përfundojë shqyrtimi nga strukturat përkatëse të Partisë Socialiste.
Keni një histori? Denonco anonimisht, identiteti juaj mbrohet.
Denonco



