Erdogan dhe Orban ‘shtangin’ Europën, 16 marrëveshje strategjike

Presidenti i Turqisë, Rexhep Taip Erdogan, priti sot në Stamboll kryeministrin e Hungarisë, Viktor Orban, me një ceremoni të plotë shtetërore në Zyrën e Punës në Dolmabahçe, duke i dhënë vizitës një peshë të veçantë politike dhe diplomatike.

Takimi zhvillohet në kuadër të mbajtjes së sesionit të 7-të të Këshillit të Bashkëpunimit Strategjik të Nivelit të Lartë Turqi–Hungari, një platformë që ka marrë rëndësi gjithnjë e më të madhe në marrëdhëniet mes dy vendeve.

Orban ndodhet në Stamboll për të thelluar më tej partneritetin strategjik me Ankaranë, në një kohë kur të dyja shtetet po forcojnë pozicionet e tyre në arenën ndërkombëtare, veçanërisht brenda NATO-s, në marrëdhëniet me BE-në dhe në politikat rajonale të energjisë dhe sigurisë.

Gjatë takimit, Turqia dhe Hungaria nënshkruan 16 marrëveshje bashkëpunimi që përfshijnë një gamë të gjerë fushash, nga mbrojtja dhe energjia te arsimi, shkenca dhe teknologjia.

Ky bashkëpunim pritet të rrisë ndërveprimin ekonomik, të thellojë sigurinë e përbashkët dhe të zgjerojë projektet dypalëshe në vitet e ardhshme.

Burime diplomatike turke theksojnë se marrëveshjet janë pjesë e një vizioni afatgjatë për të rritur rolin gjeopolitik të të dyja vendeve dhe për të ndërtuar një arkitekturë të re bashkëpunimi në rajon.

Nga ana tjetër, Orban e ka cilësuar vazhdimisht Turqinë si aleat kyç për stabilitetin energjetik dhe sigurinë kufitare të Evropës Qendrore.

Vizita e kryeministrit hungarez në Stamboll pritet të pasohet nga deklarata të përbashkëta dhe plane konkrete implementimi, ndërsa bashkëpunimi Ankara–Budapest duket se po hyn në një fazë më të thellë strategjike.