Erion Braçe shigjeron ministrin Pirro Vengu: Ku janë paratë?

Deputeti i Partisë Socialiste, Erion Braçe, ka kritikuar ministrin e Mbrojtjes, Pirro Vengu, për mungesën e dëmshpërblimeve ndaj fermerëve të prekur nga përmbytjet dhe ngricat në sektorin e bujqësisë.

Gjatë diskutimit, Braçe theksoi se në buxhet nuk rezultojnë fonde të dedikuara për zonat e Gramshit dhe Delvinës, të cilat, sipas tij, janë goditur dy herë radhazi nga fatkeqësi natyrore, fillimisht nga përmbytjet në muajin nëntor dhe më pas nga ngricat në janar.

Deputeti socialist u shpreh skeptik ndaj deklaratave të ministrit të Mbrojtjes, i cili, sipas Braçes, ka pohuar se fondet për dëmshpërblim janë kaluar. “Në buxhet nuk i gjej, nuk janë as në relacion dhe as në seancën që zhvilluam në komision. Kjo është ajo që më shqetëson”, u shpreh Braçe, duke theksuar se dëmet kanë prekur jo vetëm bagëtinë, por edhe frutikulturën, në disa nga zonat më prodhuese të vendit.

Ai pranoi se fondet për bujqësinë janë rritur dhe se realizimi i tyre është thuajse i plotë, por nënvizoi se fatkeqësitë natyrore kanë dhënë një goditje të rëndë ndaj fermerëve, të cilët, sipas tij, nuk mund të lihen pa mbështetje financiare. “Gramshi dhe Delvina u goditën fort dhe duhet të dëmshpërblehen”, tha Braçe.

Në vijim, deputeti i PS-së ngriti shqetësime edhe për mosrealizimin e shpenzimeve publike, duke deklaruar se në katër vite janë regjistruar rreth 1.2 miliardë lekë (ose 1.2 milionë euro, sipas referencës) mosrealizime, shifër që, sipas tij, përfaqëson një buxhet të plotë investimesh publike. “Janë shumë para që nuk shkojnë aty ku duhet”, theksoi Braçe.