Ish-deputeti nxjerr vendimin e gjykatës britanike: Ta kanë faktuar, je i lidhur me krimin e organizuar
Reagimi i Ervin Salianjit ka ardhur menjëherë pas deklaratave të forta të bëra nga Sali Berisha në Dibër, duke thelluar më tej përplasjen brenda Partisë Demokratike.
Ish-deputeti kundërshton drejtpërdrejt pretendimin e Berishës se ai nuk mund të garojë për drejtimin e PD-së për shkak se nuk është pjesë e saj. Sipas Salianjit, arsyeja reale qëndron te frika e Berishës nga përballja në garë, pasi mbështetja e demokratëve ndaj tij ka rënë ndjeshëm.
Në reagimin e tij, Salianji përdor tone të ashpra, duke deklaruar se Berisha është “i vetmi politikan në Partinë Demokratike i faktuar nga një gjykatë perëndimore si i lidhur me krimin e organizuar dhe që i ka përdorur këto lidhje për ndikim politik”. Ai i cilëson këto si fakte dhe jo propagandë, duke theksuar se, sipas tij, ato burojnë nga institucione ndërkombëtare dhe jo nga sistemi i drejtësisë në Shqipëri.
Duke iu përgjigjur akuzave të Berishës për kontakte të tij gjatë kohës së burgimit, Salianji kundërpërgjigjet me një linjë sulmuese, ndërsa paralajmëron publikimin e dokumenteve që provojnë lidhje të Berishës me korrupsionin.
“Sot nis publikimin e fakteve”, shprehet ai, duke e kthyer këtë në një përballje që pritet të vijojë edhe në ditët në vijim.
Në vijim të deklaratës, Salianji argumenton se Berisha është tashmë një figurë e refuzuar jo vetëm nga ndërkombëtarët, por edhe nga një pjesë në rritje e elektoratit demokrat. Sipas tij, kjo është arsyeja pse nuk zhvillohet një garë reale brenda partisë.
Reagimi i plotë i Ervin Salianjit:
Sali “kolltuku” i damkosur, jo i akuzuar kot!
Sali “kolltuku”, alias Sali “brava”, është sot i vetmi politikan në Partinë Demokratike i faktuar nga një gjykatë perëndimore si i lidhur me krimin e organizuar dhe si politikan që i ka përdorur këto lidhje për influencë politike.
Jo nga gjykatat e kapura të regjimit në Shqipëri.
Por nga qeveri të djathta perëndimore dhe nga gjykata britanike.
Ky është fakt. Jo propagandë.
Shfaqja e sotme në Dibër ishte tabloja më e qartë e rënies dhe tregoi pse ky uzurpator nuk bën garë!
Një sallë që nuk mbush dot as dy kate me 200 persona, megjithëse ishte mbledhur i gjithë qarku.
Një lider i braktisur nga demokratët.
Dhe një monolog i mbushur me mashtrime të vjetra.
Kur të lë populli, të mbetet vetëm zëri… dhe ai kthehet në zhurmë!
I njëjti model, i njëjti mentalitet
Lulzim Basha ishte “familjari i dashur” i Saliut:
e promovoi, e përdori dhe e mbrojti.
Sot, edhe pasi u largua Basha, modeli mbeti po ai:
* i njëjti ekip
* të njëjtat vese
* e njëjta mënyrë përzgjedhjeje deputetësh
* e njëjta “opozitë” që ulet në gjunjë për leje, tendera dhe pazare me Ramën
Ka vetëm një ndryshim:
Saliu sot është i refuzuar nga ndërkombëtarët, nga shoqëria dhe gjithnjë e më shumë nga vetë demokratët.
Prandaj nuk bën garë.
Prandaj ka uzurpuar PD-në si frikacak.
Sepse gara e nxjerr zbuluar dhe humb privilegjet dhe paratë per te cilat shet shpirtin!
Sot nis publikimin e fakteve.
Poshtë është një fakt i zi mbi të bardhë:
Vendimi i gjykatës britanike konfirmon se nuk bëhet fjalë për thashetheme, por për prova të mjaftueshme që lidhin Sali Berishën me korrupsion dhe krim të organizuar.
E vërteta e hidhur;
Ndërkohë që demokratët kërkojnë alternativë dhe fitore,
ata mbahen peng nga një figurë që është shpallur problem sigurie nga aleatët strategjikë të Shqipërisë.
Kjo është drama reale e Partisë Demokratike:
jo përballja me kundërshtarin se atë e mundim, por pengmarrja nga e shkuara
Koha e alibive ka mbaruar.
Ose PD ndahet nga e shkuara e korruptuar,
ose mbetet peng i saj.
Më poshtë, imazhet e publikuara nga Ervin Salianji:
