Europa mes “panikut, TIA nuk “pyet” për krizë karburanti

Aeroporti Ndërkombëtar i Tiranës vijon aktivitetin e tij pa ndërprerje, duke mos u ndikuar nga problematikat globale që lidhen me mungesën e karburantit për avionë. Sipas kompanisë, të gjitha fluturimet do të realizohen sipas planifikimit, pa devijime apo anulime të lidhura me këtë situatë.

Siguria e operimeve mbështetet nga partneri i furnizimit me karburant, Air BP, i cili ka konfirmuar se rezervat aktuale janë të mjaftueshme për të përballuar kërkesën në rritje. Kjo vjen si rezultat i një menaxhimi të qëndrueshëm dhe i përgatitjes për fluksin gjithnjë e më të lartë të pasagjerëve që është regjistruar vitet e fundit.

Autoritetet aeroportuale bëjnë me dije se zinxhiri i furnizimit funksionon normalisht dhe nuk ka asnjë sinjal për ndërprerje apo vështirësi në periudhën afatshkurtër. Situata paraqitet e stabilizuar, duke garantuar vazhdimësinë e operimeve dhe duke shmangur çdo ndikim te udhëtarët.

Në këtë kontekst, TIA mbetet një nyje e besueshme transporti ajror në rajon, duke siguruar që lëvizja e pasagjerëve dhe lidhjet ndërkombëtare të Shqipërisë të mos preken nga zhvillimet globale në tregun e karburanteve.