FIFA ngre ‘në qiellin e 7-të’ Kosovën: Ngritje historike

Kosova po shënon një moment historik në futbollin ndërkombëtar. Në një postim në Instagram, FIFA ka vlerësuar lart zhvillimin e kombëtares së Kosovës që nga debutimi i saj në 2016, duke e përshkruar rrugëtimin e ‘Dardanëve’ si një histori suksesi.

Federata Ndërkombëtare e Futbollit thekson se Kosova fillimisht ishte e renditur në vendin e 190-të në renditjen botërore, por që nga atëherë ka shënuar një rritje të vazhdueshme, duke zhvilluar ndeshje të forta me rezultate surprizë dhe duke krijuar një identitet të qartë futbollistik.

Sipas FIFA-s, Kosova ka arritur të ngjitet në vendin e 84-të, rezultati më i mirë historik për këtë kombëtare, që tregon përkushtimin dhe punën e të gjithë futbollistëve.

Në postim, gjithashtu vërehet:

“Kosova është aktualisht në vendin e dytë në grupin e saj kualifikues të Botërorit, një pozicion që e bën atë një debutuese të mundshme në Kupën e Botës përmes playoff-it.”

Vetëm një postim ka mjaftuar që FIFA të shprehë vlerësimin për Kosovën, duke theksuar rrugëtimin e shpejtë dhe të suksesshëm të Dardanëve drejt historisë së futbollit ndërkombëtar.