Kush janë prokurorët që do të përballen me vendimin final të shkarkimit ose jo

Pas zhbllokimit të punës në komisionet e ‘vetingut’ të gjyqtarëve dhe prokurorëve pas mbylljes për shkak të pandemisë, në Kolegjin e Posaçëm të Apelit ka fluks seancash.

Gjatë muajit, KPA-ja do të vendosë për fatin e ish-drejtueses së Prokurorisë së Krimeve të Rënda, Donika Prela si dhe për prokurorin Dritan Peka, drejtues i Prokurorisë pranë Gjykatës së Apelit në Tiranë.

Prela kaloi shkallën e parë të vettingut, ndërsa Komisioneri Publik e ankimoi në KPA vendimin, duke kërkuar shkarkimin e saj.

Të njëjtën kërkesë ka bërë edhe për drejtuesin e Prokurorisë së Apelit, prokurorin Peka.

Mes dhjetëra seanca gjyqësore këtë muaj dhe muajin e ardhshëm të paralajmëruara nga KPA-ja, do të merret vendim edhe për prokurorë, kandidatë për SPAK. Kandidatja Manjola Kajana, do të dalë para “gjyqit” më 16 qershor. Ndër seancat e radhës janë edhe ato për gjyqtaren Regleta Panajoti.