Furgoni i amortizuar i policisë “helmon” qytetarët në Rrugën e Arbrit

Një furgon i Policisë së Shtetit, në gjendje të rënduar teknike, ka tërhequr vëmendjen e drejtuesve të mjeteve në Rrugën e Arbrit, pasi është parë të lëshojë sasi të mëdha tymi, duke vështirësuar dukshmërinë dhe qarkullimin.

Qytetarët raportojnë se mjeti i amortizuar paraqet rrezik serioz si për sigurinë rrugore, ashtu edhe për mjedisin. Sipas dëshmive të tyre, shumë drejtues janë detyruar të ngadalësojnë për shkak të tymit të dendur, duke ngritur pyetje mbi gjendjen teknike të furgonit dhe respektimin e procedurave të kolaudimit.

Pasojat ligjore për kolaudim të parregullt

Sipas propozimeve të Kodit të Ri Penal, moskryerja e kontrollit teknik (kolaudimit), ose kryerja e tij në kundërshtim me ligjin, kur sjell rrezik për jetën e qytetarëve ose ndotje mjedisore, konsiderohet vepër penale dhe dënohet me gjobë ose deri në dy vite burgim.

Thirrja e qytetarëve

Qytetarët kërkojnë që institucionet përgjegjëse të tregojnë më shumë kujdes në kontrollin e mjeteve që qarkullojnë në rrugë, veçanërisht mjeteve zyrtare, për të parandaluar aksidente dhe ndotje mjedisore.

Ngjarja ka ngjallur shqetësim në komunitet dhe po kërkohet një reagim i shpejtë nga autoritetet për të sqaruar situatën dhe për të garantuar sigurinë e rrugëve.