Dyshohet se është mbytur gjatë stuhisë

Një ngjarje e rëndë është regjistruar në ujërat pranë ishujve të Ksamilit, ku një peshkatar është gjetur pa shenja jete pas kërkimeve të nisura nga autoritetet.

Viktima është identifikuar si Mihal Zoi, 61 vjeç. Sipas hetimeve paraprake, dyshohet se ai ka humbur jetën si pasojë e mbytjes në det.

Gjatë operacionit të kërkimit, Policia ka gjetur edhe mjetin lundrues që përdorte 61-vjeçari, i cili rezultonte i fundosur. Dyshimet e para janë se ngjarja mund të ketë ndodhur mbrëmjen e kaluar, në një kohë kur zona e bregdetit të jugut u përfshi nga mot i paqëndrueshëm, reshje dhe stuhi të forta.

Grupi hetimor ka nisur verifikimet për të zbardhur shkaqet e vdekjes, ndërsa një nga pistat kryesore është ajo e një aksidenti të shkaktuar nga kushtet e vështira atmosferike. Paralelisht, autoritetet po shqyrtojnë edhe mundësinë e një vetëvrasjeje, pa përjashtuar asnjë skenar deri në përfundimin e hetimeve.

Nga informacionet e mbledhura deri tani, mësohet se Mihal Zoi ishte i divorcuar dhe fëmijët e tij jetonin në Greqi. Në Shqipëri ai nuk kishte familjarë të tjerë të afërt, përveç një motre.

Policia vijon punën për dokumentimin e plotë të ngjarjes dhe përcaktimin e rrethanave që çuan në humbjen e jetës së peshkatarit 61-vjeçar në zonën e Ksamilit.