Gjermania zyrtarisht dakord për kufizimin e Rusisë në pagesat SWIFT

Gjermania ka mbështetur vendosjen e kufizimeve “të shënjestruara dhe funksionale” për anëtarësimin e Rusisë në sistemin e pagesave SWIFT.

Lajmi u bë i ditur nga ministrja e Jashtme gjermane, Annalena Baerbock dhe ministri i Ekonomisë, Robert Habeck.

Ata në një deklaratë të përbashkët u shprehën se, Qeveria po punon se si të “kufizojë dëmin kolateral” të kufizimeve “në mënyrë të tillë që të prekë njerëzit e duhur”.

Gjermania është vendi i fundit i BE-së që hoqi kundërshtimin ndaj sanksionit, pasi kryeministri i Italisë, Mario Draghi, dhe udhëheqësi hungarez, Victor Orban, sinjalizuan mbështetjen e tyre më herët.

Vendimi është mirëpritur nga presidenti ukrainas, Volodymyr Zelensky, i cili tha se ai ishte “mirënjohës” ndaj vendeve të BE-së për vendimin.

“Diplomatët tanë kanë luftuar gjatë gjithë kohës që të gjitha vendet evropiane të bien dakord për një vendim shumë të fortë dhe të drejtë për shkëputjen e Rusisë nga rrjeti ndërkombëtar ndërbankar (SËIFT)”, shkroi ai në median sociale Twitter.

Sipas tij, kjo shënjon miliarda e miliarda humbje për Rusinë.

“Ky është çmimi i tij për një pushtim të poshtër të shtetit tonë”, përfundoi Zelensky.

Më herët, ministri i Punëve të Jashtme të Ukrainës, Dmitry Kuleba, u shpreh se kanë filluar përgatitjet për shkëputjen e Rusisë nga sistemi ndërkombëtar ndërbankar SWIFT.

“E gjithë diplomacia ukrainase funksionoi – nga Presidenti i Ukrainës deri te atasheu në ambasadën ukrainase”, shkruan Kuleba.

Ministri vuri në dukje se diplomatët ukrainas ia kushtojnë këtë fitore të gjitë mbrojtësve të Ukrainës.

Siç raportoi UNIAN, Shtetet e Bashkuara dhe Bashkimi Evropian kanë konsideruar çështjen e shkëputjes së Rusisë nga sistemi SWIFT për një kohë të gjatë.