Gjesti bëhet ‘i gjallë’ pas daljes nga burgu: Një torturë e madhe

Pak orë pas njoftimit për lirimin e tij, këngëtari Besart Kelmendi ka reaguar për herë të parë publikisht, duke dhënë një mesazh qetësues për ndjekësit.

Përmes një postimi të shkurtër, i njohur si “Gjesti” bëri të ditur se ndodhet në gjendje të mirë dhe pranë familjes së tij, ndërsa falënderoi të gjithë për mbështetjen dhe mesazhet e shumta që ka marrë.

Por reagimi i tij nuk u kufizua vetëm me kaq. Në një deklaratë më të zgjeruar, artisti pranoi se kishte gabuar, duke kërkuar ndjesë për shqetësimin e shkaktuar, ndërsa theksoi se gjendja e tij erdhi si pasojë e një presioni të vazhdueshëm emocional.

Ai u shpreh se nuk e konsideron veten një person të tillë dhe se situata në të cilën u gjend ishte rezultat i një ngarkese të rëndë psikologjike që, sipas tij, kishte kohë që ishte krijuar.

Në vijim, këngëtari bëri një hap tjetër të rëndësishëm duke njoftuar nisjen e procedurave ligjore ndaj Onima. Sipas tij, kompania mban përgjegjësi për trajtim të padrejtë ndër vite, detyrime të pashlyera dhe dëme që kanë ndikuar drejtpërdrejt në karrierën e tij.

Në mesazhin e tij, Gjesti theksoi se, pavarësisht situatës, nuk do të ndalet në rrugën e tij artistike dhe se askush nuk mund t’ia pengojë muzikën, duke lënë të kuptohet se konflikti me industrinë muzikore do të vijojë edhe në rrugë ligjore.

Lirimi i tij nga paraburgimi u bë i mundur pas një marrëveshjeje për pranimin e fajësisë me Prokurorinë Themelore të Prishtinës, ku ai pranoi akuzat për armëmbajtje pa leje, kanosje dhe dëmtim të pasurisë, vepra që çuan fillimisht në arrestimin e tij.