Veliaj mbetet kryetar, Rusmaili dhe Gjylameti humbësit e mëdhenj

Politikë | Publik.al | 9 Tetor 2025

Drama politike që përfshiu Presidencën, Bashkinë e Tiranës dhe mazhorancën socialiste mori sot një kthesë të fortë pas vendimit të Gjykatës Kushtetuese, e cila ka rrëzuar kërkesat që synonin shkarkimin e Erion Veliajt nga posti i kryetarit të bashkisë.

Sipas vendimit të shumëpritur, Gjykata Kushtetuese ka mbrojtur rendin kushtetues, duke konstatuar se Presidenti Bajram Begaj ka tejkaluar kompetencat e tij në ndërhyrjen ndaj pushtetit vendor një akt që përbën shkelje kushtetuese.

Në këtë betejë politike dhe ligjore, Ilir Rusmaili dhe Blerina Gjylameti rezultojnë të jenë humbësit e mëdhenj. Të dy figurat, të pozicionuara në krahun e atyre që kërkonin rivlerësim të mandatit të Veliajt, dështuan të bindin trupën gjykuese për argumentet e tyre ligjore.

Vendimi i sotëm është lexuar si një fitore për Erion Veliajn, që pas muajsh tensionesh, hetimesh dhe padish politike, vijon të jetë kryetar i Bashkisë së Tiranës me mandat të plotë.

Nga ana tjetër, Presidenca dhe grupet e interesit pranë saj përballen tashmë me një valë akuzash për tentativë ndërhyrjeje në rendin kushtetues dhe për instrumentalizim politik të institucioneve.

Gjykata Kushtetuese në vendimin e saj thekson se “ruajtja e balancave midis pushteteve është themeli i rendit demokratik” dhe se çdo tejkalim kompetencash “rrezikon stabilitetin institucional të vendit.”

Vendimi pritet të ketë pasoja politike afatgjata brenda Partisë Socialiste, ku përplasjet e brendshme midis krahëve janë thelluar ndjeshëm pas këtij zhvillimi.