Gjykata Supreme e SHBA i jep të drejtë Trump: Ka vetëm 2 gjini!

Gjykata Supreme e Shteteve të Bashkuara i dha të drejtë administratës së Donald Trump për të zbatuar politikën e re që ndalon ndryshimin e gjinisë në pasaportë, duke njohur vetëm gjinisë e lindjes, mashkull ose femër, në dokumentet zyrtare.

Vendimi, i miratuar nga shumica konservatore e gjyqtarëve, konsiderohet fitore e madhe për kampin tradicionalist, ndërsa tre gjyqtaret liberale votuan kundër, duke paralajmëruar rritje të diskriminimit ndaj personave transgjinorë.

“Shfaqja e seksit të mbajtësve të pasaportave në lindje nuk shkel parimet e mbrojtjes së barabartë më shumë sesa shfaqja e vendit të lindjes,” thuhet në vendimin e gjykatës.

Pasaportat do të njohin vetëm dy gjini

Me këtë vendim, SHBA do të njohë vetëm dy përcaktime gjinore bazuar në certifikatën e lindjes, duke hequr opsionin e tretë “X” që ishte futur gjatë administratës Biden.

Vendimi ndalon personat transgjinorë dhe jobinarë të ndryshojnë identitetin e tyre gjinor në pasaportat e reja ose në ato të rinovuara.

“Qeveria, me politikën e saj të re, thjesht po dëshmon një fakt historik, pa i nënshtruar askënd trajtimi të diferencuar,” thuhet në urdhrin e Gjykatës.

Nga Biden tek Trump: kthesë e fortë në politikat gjinore

Në kohën e Joe Biden, Departamenti i Shtetit kishte lejuar qytetarët të zgjidhnin vetë gjininë e tyre dhe kishte shtuar opsionin “X” në pasaportë.

Por në ditën e tij të parë në detyrë, Trump firmosi një urdhër ekzekutiv që njeh vetëm dy gjini biologjike — mashkull dhe femër — duke rikthyer politikën e ndaluar më herët.

Kjo është një tjetër fitore për administratën republikane, pas disa vendimeve të ngjashme të Gjykatës Supreme që kanë mbështetur masat e reja kundër politikave të diversitetit, barazisë dhe përfshirjes (DEI).

Reagime të ndara brenda dhe jashtë gjykatës

Gjyqtarja liberale Ketanji Brown Jackson e cilësoi vendimin si “një devijim të pakuptimtë dhe të dhimbshëm nga drejtësia”, ndërsa theksoi se vendimi do të sjellë “dëm të menjëhershëm pa justifikim”.

Në të kundërt, Prokurorja e Përgjithshme Pam Bondi, e emëruar nga Trump, e quajti atë “fitoren e 24-t të Departamentit të Drejtësisë në seancat e emergjencës së Gjykatës Supreme”.

Edhe Senatori Marco Rubio reagoi, duke e përshkruar si “fitore të madhe për presidentin dhe për logjikën e shëndoshë”.

Aktivistë dhe figura publike reagojnë

Aktivistët transgjinorë e quajtën vendimin “një hap pas në mbrojtjen e të drejtave themelore”.

Aktoria amerikane Hunter Schafer, e njohur nga seriali Euphoria, tha se politika e re e la “të tronditur” pasi pasaporta e saj e re e përshkruante si mashkull:

“Nuk ndryshon asgjë tek unë apo tek identiteti im, por e bën jetën më të vështirë.”

Konteksti ligjor

Që nga viti 1992, Departamenti i Shtetit kishte lejuar ndryshimin e seksit në pasaportë me dokumentacion mjekësor.

Në prill, një gjyqtar federal në Massachusetts e cilësoi politikën e Trump si diskriminuese dhe në kundërshtim me Amendamentin e Pestë të Kushtetutës.

Megjithatë, vendimi i Gjykatës Supreme tani e përmbys këtë qëndrim, duke i dhënë administratës Trump një tjetër fitore në çështjet që lidhen me identitetin gjinor dhe politikat sociale.