Goditen bastet ilegale pranë shkollave në Tiranë, 8 të arrestuar

Policia e Tiranës ka zhvilluar një aksion të posaçëm në disa zona të kryeqytetit, me fokus lokalet që ndodhen pranë institucioneve arsimore dhe dyshohet se përdoreshin për organizimin e lojërave të fatit. Operacioni “Barriera” ka çuar në zbulimin e 6 ambienteve ku vendoseshin baste sportive në mënyrë të paligjshme dhe në arrestimin e 8 personave.

Kontrollet e strukturave të Policisë së Tiranës janë përqendruar në zonat përreth shkollave, me qëllim evidentimin dhe goditjen e aktiviteteve të kundërligjshme që zhvillohen në këto ambiente.

Në kuadër të operacionit të koduar “Barriera”, autoritetet kanë identifikuar 6 lokale në pjesë të ndryshme të kryeqytetit, ku zhvillohej aktivitet i paligjshëm i basteve sportive përmes celularëve.

Sipas Policisë, hetimi është kryer përmes veprimeve proaktive nga specialistët e Seksionit për Hetimin e Mashtrimeve Kibernetike, në bashkëpunim me Prokurorinë. Në aksion janë përfshirë gjithashtu shërbimet e Komisariatit të Policisë Nr. 2 dhe Forcës së Posaçme Operacionale.

Gjatë ndërhyrjes janë arrestuar në flagrancë 8 persona. Mes tyre janë M. M., 20 vjeç, dhe S. A., 23 vjeç, të dy punonjës në dy prej lokaleve të kontrolluara.

Në pranga kanë përfunduar gjithashtu D. V., 24 vjeç; B. Ç., 42 vjeç; E. S., 43 vjeç; A. D., 26 vjeç; E. B., 24 vjeç dhe O. A., 21 vjeç.

Sipas të dhënave të bëra publike nga Policia, personat janë kapur në flagrancë në ambientet e subjekteve, në momentin kur po vendosnin baste sportive.

Gjatë kontrolleve, efektivët kanë sekuestruar si prova materiale pajisje DVR, si dhe 9 telefona celularë në të cilët ishin aktive faqe të përdorura për lojëra fati. Pajisjet dyshohet se shërbenin për realizimin dhe menaxhimin e aktivitetit të paligjshëm të basteve.

Hetimet nuk janë mbyllur me arrestimet e kryera. Strukturat policore vijojnë kontrollet dhe veprimet hetimore për të identifikuar persona të tjerë që mund të kenë pasur rol në këtë veprimtari.

Materialet procedurale të mbledhura gjatë operacionit i janë referuar Prokurorisë për vijimin e hetimeve dhe kryerjen e veprimeve të mëtejshme ligjore.